Almaty qalasyndaǵy BUU ǵımaratynda shtattyq sany 120 adamnan asatyn 18 agenttik ornalasqan
Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi jáne Almaty qalasynyń Ákimi Erbolat Dosaev BUU agenttikteriniń basshylarymen jáne ońtústik astanada akkredıttelgen dıplomatıalyq korpýspen birlesken kezdesý ótkizdi, dep habarlaıdy Almaty-akshamy.kz.
Almatydaǵy halyqaralyq uıymdarynyń keńsesine barý barysynda ǵımaratqa «UN Plaza» ataýyn berý rásimi ótti. Bul ǵımarattyń resmı ınaýgýrasıasy 2019 jyldyń mamyr aıynda QR Prezıdenti Qasym-Jomart Toqaevtyń qatysýymen ótti. Búgingi tańda Almaty qalasyndaǵy BUU ǵımaratynda shtattyq sany 120 adamnan asatyn 18 agenttik ornalasqan.
BUU ókilderimen kezdesý barysynda M. Tileýberdi BUU-nyń Qazaqstanda bolǵanyna 30 jyl tolýymen quttyqtap, osy kezeńdegi elimiz ben jahandyq Uıym arasyndaǵy ózara is-qımyldyń joǵary deńgeıin atap ótti. Qazaqstannyń Almatyda Ortalyq Azıa men Aýǵanstan úshin Ornyqty damý maqsattary boıynsha BUU Óńirlik ortalyǵyn qurý jónindegi bastamasyna erekshe nazar aýdaryldy. «Mýltılateralızmge berik senim men mindetteme, boljamdy jáne syndarly syrtqy saıasat Qazaqstan úshin basymdyq bolyp tabylady. Óńirlik ortalyqtyń qyzmeti BUU óńirlik damý júıesin iske asyrý sheńberinde tıimdi qural bolady», – dedi QR SİM basshysy.
Sonymen qatar, Mınıstr kezdesýge qatysýshylardy Prezıdent Q. Toqaev bastamashylyq etken eldegi saıası reformalardyń iske asyrylý barysy jáne 2023 jylǵy 19 naýryzda josparlanǵan aldaǵy parlamenttik saılaýǵa daıyndyq týraly habardar etti.
Óz kezeginde Almatydaǵy BUU men dıplomatıalyq korpýs ókilderi el basshylyǵynyń «Jańa jáne Ádiletti Qazaqstandy» qurýǵa baǵyttalǵan kúsh-jigerin joǵary baǵalady jáne Almatyda qyzmetti júzege asyrý úshin qolaıly jaǵdaıdy qamtamasyz etýde kórsetken qoldaýy úshin Úkimet pen Ákimdikke alǵysyn bildirdi.