Bazar ıeleri óz máselelerin sheshý úshin qala turǵyndaryn paıdalanady
Almaty ákimi Erbolat Dosaev búgin Jetisý aýdanynyń turǵyndarymen kezdesý barysynda «Rahat» bazarynda jumys isteıtin kásipkerlerdiń suraǵyna jaýap berdi, dep habarlaıdy Almaty-akshamy.kz.
«Rahat» bazary kásipkeriniń suraǵy:
- Ótken jyldyń naýryz aıynda bizdiń jaryǵymyzdy óshirip tastady. Biz jaldaý aqysyn jáne barlyq salyqtardy tóleımiz. Aýdan ákimi: jerdi bosatyńyz, ol memleketke tıesili deıdi. Al biz kimbiz? Biz jaryqsyz, otynsyz ómir súremiz, kómektesińizshi.
Almaty ákimi Erbolat Dosaevtyń jaýaby:
- Ókinishke oraı, men kómektespeımin. Nege ekenin túsindireıin. Bazar ıeleri sizderdi únemi aldaryna salady: mine, siz baryńyz, aıtyńyz deıdi. Bul bazar turǵan jer jalǵa alynǵan, ol qalaǵa qatysty, bazar ıelerine onyń esh qatysy joq. Bazar ıeleri óz máselelerin sheshý úshin qala turǵyndaryn paıdalanady.
Mundaı nashar jaǵdaı qalada 56 bazardyń eshqaısysynda joq. Men bazarda bolyp, jaǵdaıdy ózim kórgen soń aıtyp otyrmyn. Bazar ıesi kóp jyldan beri oǵan bir tıyn da salmaǵan. Aı saıynǵy jaldaý aqysyn siz onyń qaltasyna salasyz. Ol siz týraly oılaı ma? Shatyrdy jabýdyń ornyna, ol qaltasyn oılaıdy.
Bazar aýmaǵyn memleket menshigine berý týraly sot sheshimi bar, biz sot sheshimimen jumys isteımiz, basqa jol joq.
Jetisý aýdanynyń ákimi Gúlnar Kókebaevanyń jaýaby:
- Erbolat Asqarbekuly, men ol jaqqa birneshe ret baryp, kórshi bazarlardyń dırektorlarymen sóılestim. Olardyń barlyǵy oryn berdi, baǵalaryn aıtty, kepildikter berdi, men onda kásipkerlerge ne unamaıtynyn bilmeımin.
Almaty ákimi Erbolat Dosaevtyń jaýaby:
- Bıznesti joǵaltpaý jáne jappaý úshin basqa orynǵa kóshýge bolady ǵoı. Kórshi bazarlar jeńildik jasaýǵa, bir jylǵa turaqty jaldaý baǵasyn belgileýge daıyn.
Men orynbasarǵa tapsyrma beremin, ol sizdi kelesi aptada qabyldaıdy. Taǵy qandaı kómek qajet, múmkin bolsa kómektesemin. Biraq taǵy da qaıtalaımyn, basqa jerge, kórshi bazarlarǵa kóshińiz.