Aqtóbe oblysynda qatty boran men qalyń qardyń saldarynan jolda qalǵan 68 shetel azamaty qutqaryldy, dep habarlaıdy Aqshamnews.kz tilshisi.
Oblys ákimdiginiń málimetinshe, Áıteke bı aýdany mańyndaǵy tasjolda tehnıkalyq aqaýǵa baılanysty jolaýshylar avtobýsy qar qursaýynda qalǵan. Avtobýsta 57 adam, onyń ishinde 3 bala bolǵan. Qutqarýshylar Máskeýden Tájikstan Respýblıkasyna baǵyt alǵan avtobýstaǵy barlyq jolaýshyny qaýipsiz jerge evakýasıalaǵan. Olardyń barlyǵy – Tájikstan azamattary.
Jolaýshylar ýaqytsha Qarabutaq aýyly meshitindegi jylytý pýnktine ornalastyryldy. Medısınalyq kómekke muqtajdyq bolmaǵan.
Bul – óńirdegi jalǵyz jaǵdaı emes. Sol kúni Qarǵaly aýdanynda «Josaly – Ashylysaı» tasjolynda eki kólik jolda qalyp, ishinde Ózbekstannyń 11 azamaty bolǵany anyqtaldy. Olar Tashkentten Máskeýge baǵyt alǵan. Kólikter súıretilip, jolaýshylar Josaly aýylyndaǵy bazaǵa jetkizildi. Olarǵa da medısınalyq kómek qajet bolmady.
Tótenshe jaǵdaılar mınıstrligi qolaısyz aýa raıy kezinde alys jolǵa shyqpaýǵa jáne qozǵalys shekteýleri týraly resmı aqparatty qadaǵalap otyrýǵa shaqyrdy.