Búgin Almatyda zamanaýı Digital Fest Almaty festıvali ótýde. Úlken ınteraktıvti alańǵa aınalyp shyǵa kelgen Panfılov kóshesine jınalǵan almatylyqtar men shahar meımandaryna robottar qyzmet kórsetýde.
Qala kúnin merekelep júrgen turǵyndar sıfrlyq aımaqta jańa tehnologıamen jabdyqtalǵan erekshe keńistiktegi drondar ornalasqan “Bolashaq sferasyn”, Almatynyń sımvolyna aınalǵan "Sıfrlyq almany" tamashalaýda. VR-oıyndar men taqyryptyq fotoaımaqtarda kezekke turǵandar qarasy da az emes.
Iá, Qala kúninde demalýǵa, serýendeýge shyqqan turǵyndardy qas qaǵym sátte-aq portretińizdi salyp beretin sýretshi-robot, merekeniń mezetterin máńgilik estelikke aınaldyryp beretin fotograf-robot pen erekshe sátterińizdi beınebaıanǵa túsire qoıatyn operator-robot ta qarsy alýda.
Jarq-jurq etken aımaqta qydyryp júrgen úlken de, kishi de kóńildi. Olar sıfrlyq keıipkerlermen birge merekelik atmosferaǵa enip ketýde. Bul festıvál ozyq tehnologıa men mádenıet máıegin toǵystyryp, otbasylyq demalysqa, ınteraktıvti oıyndarǵa jáne balalardyń ınovasıalar álemimen tanysýyna múmkindik beredi deıdi uıymdastyrýshylar.
Prezıdentimizdiń kúni keshe jarıalanǵan Joldaýynda elimizdi tolyqqandy sıfrlyq memleketke aınaldyrý – strategıalyq mindet retinde belgilengen, al bul úderiste Almatynyń róli burynǵydan da mańyzdy bola túspek. Sebebi, megapolısimiz elimizdegi sıfrlyq transformasıanyń aldyńǵy shebinde tur.
_”Bizdiń kezimizde sıfrlandyrý degen uǵym bolǵan joq. Nemerelerim erekshe kózildirikter kıip, túrli oıyndar oınap máz boldy. “Kaleıdoskop” degen fotozonasy da keremet eken. Jáshiktegi almalardy balalarǵa robottyń alyp berip jatqany tipti qyzyq. Zamanaýı kóshten qalmaı, osylaı jahandanyp jatqanymyz Almatydaı alyp qala úshin de, ony damytatyn bolashaq urpaq úshin de mańyzdy", – deıdi qala turǵyny, zeınetker Raýshan Eskermesova.
Zamanaýı ınteraktıvti Digital Fest Almaty festıvali keshke deıin jalǵasady.