Qala kúnine arnalǵan negizgi saltanatty is-shara megapolıstiń Astana alańynda ótýde. El aldyna shyǵyp sóz sóılegen Almaty ákimi Darhan Satybaldy jınalǵan qaýymdy Qala kúnimen quttyqtady.
Sondaı-aq tarıhy tereń qalamyzdyń Táýelsizdiktiń talbesigi retinde aıryqsha orynǵa ıe ekenin, dál osy jerde egemen elimizdiń talaı taǵdyrly sheshimi qabyldanyp, memleket damýyna tyń serpin bergenin atap ótti.
Aýa raıy da jarqyrap turǵandyqtan bolar, mereke mezetterine kýá bolýǵa asyqqan almatylyqtar men qala qonaqtarynda san joq. Ardagerler, memleket jáne qoǵam qaıratkerleri, zıaly qaýym ókilderi de tórden oryn aldy.
_”Almaty mádenıet pen bilimniń berekeli oshaǵy ǵana emes, úlken órkenıettiń de bastaýy. Qala jańa tehnologıa, jasandy ıntellekt pen ınvestısıanyń ortalyǵyna aınalýda. Bul oraıda jemisti jetistikter jalǵasyn taba beredi, ol úshin barlyq jaǵdaıdy jasaýdamyz", – dedi shahar basshysy.
Jarqyn kóńil kúıdegi úlken-kishi bas qosqan Astana alańyn otandyq juldyzdardyń án-jyry terbep tur qazir. Merekelik sahnada Roza Rymbaeva, ańyzǵa aınalǵan "Dos-Muqasan", Zarına Altynbaeva, Jámıla Serkebaeva, Birjan Hasanǵalıev, Baýyrjan Mýsın, Arýjan Danyshpan, Erlan Baınazarov, “Il canto" kvarteti jáne basqa da artıser óner kórsetti. Kóptiń yqylas-qoshameti de merekeniń ajaryn aıshyqtaı tústi.