Salyq kodeksine engizilgen ózgeristerge sáıkes, 2022 jyldyń 1 qańtarynan bastap sıfrlyq maınıng úshin tólemaqy engizildi, dep habarlaıdy Almaty-akshamy.kz QR QM Memlekettik kirister komıtetine silteme jasap.
Tólemaqyny tóleý tártibi Salyq kodeksiniń 69-taraýynyń 11-paragrafymen retteledi.
Sıfrlyq maınıngti júzege asyratyn tulǵalar tólemaqy tóleýshiler bolyp tabylady jáne tólem qyzmetti júzege asyrý kezinde tutynylǵan elektr energıasynyń naqty kólemi úshin alynady.
Tólemaqy somasy elektr energıasynyń naqty kólemine súıene otyryp esepteledi, tólemaqy stavkasy elektr energıasynyń 1 kılovatt-saǵaty úshin 1 teńge mólsherinde aıqyndalady (kVt/saǵ sany*1 teńge).
Tólemaqyny esepteý úshin salyq kezeńi - toqsan bolyp tabylady. Sıfrlyq maınıng úshin aqy tóleý Respýblıkalyq búdjetke 105 317 Búdjettik synyptama kodyna (BSK) júrgiziledi. Tólemaqy tóleýshiler tólemaqy somasyn búdjetke toqsan saıyn esepti toqsannan keıingi aıdyń 20-kúninen keshiktirmeı tóleıdi. Mysaly, 2022 jyldyń birinshi toqsany úshin tólemaqyny 2022 jyldyń 20 sáýirinen keshiktirmeı tóleý qajet, - dep atap ótti QR QM MKK-de.
Tóleýshiler tólemdi sıfrlyq maınıng qyzmetin júzege asyrý orny boıynsha (sıfrlyq maınıngke arnalǵan jabdyqty ornalastyrý orny boıynsha) tóleıdi. Bul rette sıfrlyq maınıng úshin tólem boıynsha salyq eseptiligin tapsyrý Salyq kodeksinde kózdelmegen.