Qazaqstanda memlekettik qyzmetke irikteý rásimi jeńildetildi. Endi úmitkerler barlyq kezeńderden úıden shyqpaı-aq, «eQyzmet» aqparattyq júıesi arqyly óte alady.
Adamı faktordy boldyrmaý jáne rásimniń ashyqtyǵyn qamtamasyz etý maqsatynda táýelsiz proktorıng júıesi engizildi. Konkýrs jeńimpazy aqparattyq júıe arqyly avtomatty túrde, barlyq kezeńderdegi jınaq baldyń negizinde anyqtalady.
Júıe barlyq qajetti qujattar men derekterdi avtomatty túrde júkteıdi. Qorytyndysynda úmitker elektrondyq sıfrlyq qoltańbamen jumysqa ornalasý týraly ótinishke qol qoıady jáne quttyqtaý habarlamasyn alady.
Quqyqtyq aktiler sany qysqartyldy. Sonymen qatar, mátindermen jáne sıfrlyq aqparatpen jumys isteý daǵdylaryn baǵalaıtyn jańa kezeńder engizildi. Bul úderistiń ýaqytyn edáýir qysqartyp, memlekettik qyzmetke kirýdi jeńildetti.
Memlekettik qyzmettiń jańa gıbrıdti modeli mansaptyq pen pozısıalyq júıelerdiń eń jaqsy erekshelikterin biriktiredi. Bul tásil túrli saladaǵy mamandar úshin memlekettik qyzmetke ashyq ári ádil qoljetimdilikti qamtamasyz etedi.
Búginde 68 memlekettik organ memlekettik qyzmetke irikteýdi jańa formatta júrgizip jatyr. Jergilikti atqarýshy organdar, máslıhattar jáne Almaty qalasynyń tekserý komısıasy 2025 jyldyń ekinshi jartyjyldyǵynan bastap osy formatqa kóshedi.
«Qazaqstan Respýblıkasynyń memlekettik qyzmeti týraly» Zańnyń 15-baby 6-tarmaǵyna sáıkes, memlekettik tapsyrys sheńberinde joǵary nemese joǵary oqý ornynan keıingi bilim alǵan azamattar oqý aıaqtalǵannan keıin bir jyl ishinde kelesi laýazymdarǵa konkýrssyz ornalasý múmkindigine ıe:
-
aýdan, oblys nemese oblystyq mańyzy bar qala ákimdigi men máslıhaty apparattarynyń tómengi laýazymdary (oblys ortalyqtary emes);
-
jergilikti búdjetten qarjylandyrylatyn atqarýshy organdardyń basshy emes laýazymdary;
-
aýyl, kent, aýyldyq okrýg ákimdigi apparatynyń laýazymdary;
-
ortalyq memlekettik organdardyń aýmaqtyq bólimshelerindegi basshy emes laýazymdar.
Sondaı-aq, jeke sektordan kelgen úmitkerlerge arnalǵan jańa biliktilik talaptary bekitildi. Biliktilikke sáıkes kelgen jaǵdaıda túlekter www.gov.kz jáne www.eqyzmet.gov.kz portaldary arqyly bos laýazymdarǵa ótinish bere alady.
Qazaqstan Respýblıkasy Memlekettik qyzmet isteri agenttiginiń Almaty qalasy boıynsha departamenti janynda Jas memlekettik qyzmetshiler mektebi jumys isteıdi. Mekteptiń maqsaty – talantty ári belsendi jastardy memlekettik qyzmetke tartý. Joǵary kýrs stýdentteri men túlekter tegin oqytylyp, memlekettik organdarda taǵylymdamadan ótedi.
V. Myrzageldınova,
Memlekettik qyzmet basqarmasynyń basshysy
Qazaqstan Respýblıkasy Memlekettik qyzmet isteri agenttiginiń
Almaty qalasy boıynsha departamenti