Qazaqstan Prezıdenti Qasym-Jomart Toqaev SHYU plús otyrysyna qatysýshylar aldynda sóz sóıledi, dep habarlaıdy almaty-akshamy.kz.
Memleket basshysy búginde álem buryn-sońdy bolmaǵan geosaıası qaıshylyqtar men shıelenis áleýetiniń kúsheıýinen týyndaǵan kúrdeli syn-qaterlermen betpe-bet kelip otyrǵanyn atap ótti.
"Halyqaralyq qaýipsizdik arhıtektýrasyna qaýip tónip tur, bul búkil adamzat úshin aýyr zardaptarǵa ákelýi múmkin. Osyndaı taǵdyrsheshti kezeńde bizge óńirlik jáne jahandyq deńgeıde ujymdyq kúsh-jiger arqyly beıbitshilikti, turaqtylyq pen qaýipsizdikti nyǵaıtý úshin orasan zor jaýapkershilik júkteledi", – dedi Qasym-Jomart Toqaev.
Onyń aıtýynsha, SHYU óziniń bedelin, eleýli ekonomıkalyq jáne adamı resýrstaryn eskere otyryp, turaqty damý maqsattaryna qol jetkizý jáne zamanaýı syn-qaterlerdi eńserý úshin tıimdi sheshimder ázirleýge qabiletti.
Buǵan deıin elordadaǵy Táýelsizdik saraıynda SHYU-nyń keńeıtilgen quramdaǵy otyrysy bastaldy. Oǵan qatysýshylar birlik, kelisim jáne damý máselelerin talqylaıdy.