Arnaıy qurylǵan komısıa Shymkent qalasyndaǵy jarylys shyǵynyn eseptep jatyr. Oqıǵadan kópqabatty úı, kólikter ǵana emes, oblystyq perınataldyq ortalyqtyń ǵımaraty men qymbat medısınalyq qural-jabdyqtar zardap shekkeni belgili, dep habarlaıdy Almaty-akshamy.kz Inform.kz-ke silteme jasap.
Tótenshe jaǵdaı oryn alǵan jerdiń janynda birinshi qabatta jansaqtaý bólimi ornalasqan. Onda shala týǵan náresteler jatqan edi. Úshemniń biri qaıtys boldy. Brıfıńte qoǵamdyq densaýlyq saqtaý basqarmasynyń basshysy Marat Páshimov olardyń anasynyń qaıǵyly oqıǵadan birneshe saǵat buryn taǵy bir balasynan aıyrylǵanyn málimdedi. Jergilikti ákimdik qaza tapqan úsh adamnyń otbasyna materıaldyq kómek kórsetedi.
Qaza bolǵandar arasynda perzenthananyń kúzetshisi men brıgada quramynda kúrdeli jóndeý jumystaryn júrgizip jatqan qurylys kompanıasynyń qyzmetkeri de bar. Qazir dárigerler apat saldarynan zardap shekkenderdiń ómiri úshin kúresip jatyr. Olardyń arasynda perınataldyq ortalyq qyzmetkerleri: sanıtarlar, medbıke jáne perzenthanaǵa ınternet ornatýǵa kelgen taǵy bir er adam bar. Naýqastardyń jaǵdaıy erekshe baqylaýǵa alyndy.
Búginde №1 oblystyq perınataldyq ortalyqtyń pasıentteri №2 oblystyq perınataldyq ortalyqtyń ǵımaratyna, Shymkent qalasynyń №1, 2 qalalyq aýrýhanalaryna, qalalyq perınataldyq ortalyqqa jáne oblystyq balalar aýrýhanasyna kóshirildi. Olar dárigerler men psıhologtardyń turaqty baqylaýynda turǵanyn keshe óńirde ótken baspasóz konferensıasynda DSM Ana men bala densaýlyǵyn qorǵaý departamentiniń dırektory Maǵrıpa Embergenova habarlady.
«Túrkistan oblysy qoǵamdyq densaýlyq basqarmasynyń bastyǵy Marat Pashımovpen jáne medısınalyq uıymdardyń birinshi basshylarymen birlesip, jarylys kezinde zardap shekkender jatqyzylǵan klınıkalardy aralap shyqtyq. Eki pasıenttiń jaǵdaıy turaqty, ortasha aýyr jaǵdaıda 7 pasıent bar, qajetti beıindi medısınalyq kómek tolyq kólemde kórsetildi. Naýqastarmen áńgime júrgizildi, kórsetiletin medısınalyq kómektiń sapasyna pasıentter qanaǵattandy», - dep habarlady mınıstrlik ókili.
Aıta keteıik, buǵan deıin Shymkenttegi perınataldyq ortalyqtyń qasyndaǵy dári saqtaıtyn eki qabatty ǵımaratta jarylys bolǵanyn habarladyq. Perzenthana ǵımaraty men turǵyn úıge zaqym kelip, ondaǵy adamdar qaýipsiz jerge kóshirilgen edi. Shymkenttegi jarylystan kúzetshimen qosa bir náreste shetinegeni málim boldy. Keıinirek jarylystan úshinshi adamnyń qaıtys bolǵany habarlandy.