Músinshiler eskertkishtiń birneshe nusqasyn usynǵan.
Shymkentte memleket qaıratkeri Ózbekáli Jánibekovke eskertkish qoıylady, , dep habarlaıdy Almaty-akshamy.kz Aikyn.kz-ge silteme jasap.
Eskertkish qoılatyny týraly Shymkent qalasy ákiminiń birinshi orynbasary Shyńǵys Muqannyń Facebook jelisinde jazǵan.
Onyń jazýynsha, Ózbekáli Jánibekovke Shymkentten eskertkish ornatý úshin baıqaý jarıalanǵannan keıin músinshiler birqatar nusqalar usynǵan. Alaıda bul nusqalardy qalalyq ákimdikte arnaıy komısıada qarap shyqqan soń, Shyńǵys Muqan Ózbekáli Jánibekovtiń balasy Baýyrjanǵa habarlasqanyn aıtty. Ol kisi belgili músinshi Tileýberdi Bınashevke tapsyrys berip, eskertkishtiń bir nusqasyn daıyndatyp qoıǵan.
«Eskertkishtiń tuǵyrda turǵanyn qalamaımyn. Joǵarydan tómenge qarap. Eskertkishtiń bıik minberde otyrǵanyn qalamaımyn. Ol kisi halyqtyń arasynda bolǵan. Kórisem dese de, kezdesem dese de, kez kelgen adamnyń qoly jetken. Sondyqtan, eskertkish adamnyń boıyndaı bolyp jasalyp, halyq kóp júretin bir saıabaqqa qoıýdy usynamyn», – degen Baýyrjan Ózbekáliuly.
Shyńǵys Muqan eskertkishti júrginshi joldaǵy órnektastyń ústine qoıǵan durys dep sanaıdy.
«Eńseli eskertkishterdi tuǵyrda nemese ıa taq, ıa at ústinde kórip úırenip qalǵan sanamyz jańa kózqarasty á degennen qabyldaı qoımady. Erteń baryp Ózaǵańnyń eskertkishin júrginshi joldaǵy órnektastyń ústine qoıa salsaq, birazǵa deıin gý-gýge arqaý bolýy múmkin. Biraq kún ótken soń, jańalyq qabyldanyp, erekshelenip turmaq. Ózbekáli Jánibekovtiń eskertkishi sonysymen qundy bolmaq dep oılaımyn», – dep jazdy Shyńǵys Muqan.