Mınıstrlik olımpıadaǵa qatysýshylardyń ýlaný jaǵdaıyna túsinik berdi.
Oqý-aǵartý mınıstrliginiń baspasóz qyzmeti Shymkentte ótip jatqan respýblıkalyq olımpıada kezinde oqýshylardyń astan jappaı ýlanýyna qatysty túsinik berdi, dep habarlaıdy Almaty-akshamy.kz.
Osy kúnderi Shymkent qalasynda jaratylystaný-matematıka pánderi boıynsha respýblıkalyq olımpıada ótip jatyr.
Balalardyń astan ýlanyp qalǵany jóninde áleýmettik jelilerde jazylýda. Shaǵymdarǵa «Daryn» respýblıkalyq ǵylymı-praktıkalyq ortalyǵy da, Oqý-aǵartý mınıstrligi de jaýap berdi.
«21 naýryz kúni olımpıadanyń 904 qatysýshysynyń 12-sinde dene qyzýynyń kóterilýi, asqazan-ishek joldary qyzmetiniń buzylýy túrinde syrqat belgileri paıda boldy. Shaqyrylǵan jedel járdemniń medısına mamandary qarap shyqqannan keıin balalardy Shymkent qalasynyń ınfeksıalyq aýrýhanasyna jetkizý sheshimi qabyldandy.
Qazirgi ýaqytta balalardyń jaǵdaıy turaqtaldy. Shymkent qalasynyń sanıtarlyq-baqylaý qyzmeti bolǵan oqıǵanyń sebebin anyqtaý sharalaryn júrgizip jatyr. Balalar medısına mamandarynyń baqylaýynda. Olımpıadanyń uıymdastyrý komıteti atalǵan qatysýshylarǵa psıhologıalyq kómek kórsetýde», - delingen «Daryn» ortalyǵynyń resmı málimetinde.
Atap ótilgendeı, olımpıadanyń ekinshi kezeńi belgilengen ýaqytta bastalǵan. Aýrýhanada jatqan 12 oqýshy oǵan qatysa almady.
«Degenmen de, oqýshylardyń olımpadanyń qorytyndy kezeńine joldama alýy tańdaǵan páni boıynsha olardyń joǵary daıyndyǵyn kórsetip otyr. Olımpıadany uıymdastyrý komıteti jeńiske degen jigeri úshin balalarǵa alǵys aıtady jáne olımpıada nátıjesi boıynsha olar yntylandyrylatyn bolady», - dedi ortalyqtan.
Al mınıstrliktiń málimetine súıensek, oqıǵanyń mán-jaıyn anyqtaý úshin Shymkentke vıse-mınıstr bastaǵan delegasıa attanyp ketti.
«Oqý-aǵartý mınıstriniń tapsyrmasymen vıse-mınıstr Sholpan Karınova, Orta bilim berý komıteti tóraǵasynyń orynbasary, Balalar quqyǵyn qorǵaý komıtetiniń tóraǵasy bastaǵan jumys toby sol jerge attanyp ketti. Jumys toby árbir máseleni muqıat tekseretin bolady. Jaǵdaı Oqý-aǵartý mınıstrliginiń jeke baqylaýynda», - dep jazdy mınıstrdiń baspasóz hatshysy Mereke Nurmuhanova.