Shymbulaq jáne Oi-Qaragai taý kýrorttary SKI BUSINESS AWARDS bedeldi marapattaryna ıe boldy
Almaty jáne Almaty oblysynyń kýrorttary halyqaralyq marapattaý rásiminde eń kóp júldege ıe boldy, dep habarlaıdy aqshamnews.kz
SKI BUSINESS AWARDS jyl saıynǵy marapattaý rásimi 3-6 qazan aralyǵynda Mıneraldy Sýlar mekeninde halyqaralyq týrısik aýmaqtar forýmynyń aıasynda ótti. Munda týrısik ındýstrıanyń mamandary kásibı tájirıbelerimen bólisip, naryq qatysýshylarynyń ózara árekettesýiniń jańa formattaryn jáne TMD elderiniń sheteldik seriktesterimen týrısik ınfraqurylym qurýdy talqylady.
Marapattaý 2023-2024 jylǵy maýsym qorytyndylary boıynsha berildi. Sheshim birneshe kezeńnen turdy – taý ındýstrıasyndaǵy bedeldi mamandar komısıasynyń aldynda jobany qorǵaý, sondaı-aq taý shańǵysyn súıetinder arasynda daýys berý arqyly sheshim qabyldandy.
Daýys berý qorytyndysy boıynsha «Shymbulaq» taý kýrorty «TMD elderiniń úzdik taý shańǵysy kýrorty» ataǵyna ıe boldy. Sonymen qatar «Taý aımaǵyndaǵy úzdik glempıng/kempıng» nomınasıasynda jeńiske jetti. «Oi-Qaragai» taý kýrorty «Úzdik IT-sheshim» jáne «Úzdik balalar lageri baǵdarlamasy» marapattaryn ıelendi.
«SKI BUSINESS AWARDS marapattaý rásiminde bizdiń kýrort TMD elderiniń 150 kýrortynyń arasynan taǵy da úzdikter qatarynan kórindi! Biz eki nomınasıada birden jeńiske jettik: «Úzdik glempıng/kempıng», sondaı-aq eń bedeldi kategorıada – «TMD elderiniń úzdik kýrorty» ataǵyn aldyq. Jeńimpazdardy tańdaý birneshe kezeńnen turdy, oǵan daýys berý jáne sarapshylar komısıasynyń aldynda jobany qorǵaý kirdi. Búkil komandamyzdy osy tamasha jetistikpen quttyqtaımyn! Úshinshi jyl qatarynan eń bedeldi nomınasıa Qazaqstanǵa oralyp otyr! Bul keremet nátıje jáne bizdiń jumysymyzdyń joǵary deńgeıiniń dáleli. Osy jetistikke úles qosqan árqaısyńyzǵa alǵys aıtamyn! Qazaqstandyqtar, biz buǵan qol jetkizdik!», - dep pikir bildirdi «Shymbulaq» taý kýrorty bas dırektory Rınat Abdrahmanov.
Marapattaý rásiminde «Oi-Qaragai» taý kýrortynyń PR bóliminiń basshysy Maksım Kozlov pikir bildirdi :
«Bizdiń komanda árdaıym qyzmet kórsetý deńgeıin jetildirýge tyrysady. Sondyqtan kelýshilerge qyzmet alý qarapaıym ári yńǵaıly, al usynylatyn qyzmetterdiń sapasy joǵary bolýy úshin barymyzdy salýdamyz. Kýrorttyń IT salasyndaǵy úzdik dep tanylýy – úlken jetistik, óıtkeni qazir kýrort keńeıip, jańa «Aqtas» aımaǵyn ashýda. Bul – shamamen 55 shaqyrym jańa trassalar, jańa aspaly joldar men jańa aýmaqtar. Prosesterdi ońtaılandyrý – basym mindetterdiń biri. «Taý kýrortyndaǵy úzdik balalar lageri baǵdarlamasy» marapaty – bul jeke jetistik, ol osy baǵytty jasaýshylardyń eńbegi. Olar usynylǵan qyzmetterdiń eń joǵary deńgeıde bolýyn qamtamasyz etýde».
Anyqtama:
Shymbulaq – álemdik standarttarǵa saı keletin Qazaqstannyń basty kórikti jerleriniń biri. Jyl saıyn 1,5 mıllıonnan astam kelýshini qabyldaıdy jáne iri halyqaralyq sporttyq jarystardy ótkizý tájirıbesimen bólise alady. Sonymen qatar, 2023 jyldyń naýryzynda «Shymbulaq» taý kýrorty álemdegi eń bıik túngi taý shańǵy eńisi retinde Gınnestiń rekordyn ornatty, onyń bıiktigi – 3200 metr.
Oi-Qaragai – Tán-SHan taýlarynyń baýraıynda ornalasqan Qazaqstannyń eń tanymal taý kýrorttarynyń biri. Kýrort shańǵyshylar men snoýbordshylarǵa arnalǵan túrli trassalardy, zamanaýı aspaly joldardy jáne damyǵan ınfraqurylymdy usynady. Oi-Qaragai otbasylyq demalysqa erekshe nazar aýdara otyryp, balalar men jasóspirimderge arnalǵan baǵdarlamalardy usynady. Kýrort jańa tehnologıalar men IT-sheshimderdi belsendi engizýde, bul ony óńirdegi taý shańǵy týrızminiń kóshbasshylarynyń birine aınaldyrady.