Shyǵys Qazaqstan oblysynda taǵy da alapat órt tutandy.
Zaısan, Altaı, Ulan jáne Glýbokoe aýdanynda qurǵaq shóp janyp jatyr. Al Óskemen qalasynda saıajaı men jeke úıler jáne keıbir komersıalyq nysandar janyp ketti. Óńirdegi órt sóndirýshilerge kesheden beri 60-qa jýyq shaqyrý túsken, dep habarlaıdy Almaty-akshamy.kz. Qazaqstan.tv saıtyna silteme jasap.
Alapat órt áli tolyq sóngen joq. Qýrap turǵan shóp tutanǵan soń, sóndirýge des bermeı jatyr. Kesheden beri toqtaýsyz soqqan qara daýyl jaǵdaıdy múlde qıyndatyp jiberdi. Qazir Ulan, Zaısan, Kúrshim, Altaı aýdandaryndaǵy órt áli tolyq sóngen joq. Dál qazirge deıin 2000 gektardaı jer janyp ketken. Órttiń naqty aýmaǵy áli tolyq anyqtalǵan joq. Jalpy, ár aýdandaǵy órttiń kólemi ár túrli. Eń aýqymdysy - Ulan aýdanynda. Bir ǵana Borsaq aýyly aýmaǵynda 600 gektar jer janyp ketti. Tilsiz jaýmen kúreske jalpy oblys boıynsha 120 tehnıka men 800-ge jýyq adam jumyldyryldy. Tek órt sóndirýshiler emes, orman sharýashylyǵy mamandary jáne Qorǵanys mınıstrliginiń sarbazdary da kómektesti. Bir MI-8 tikushaǵy da tartyldy. Tótenshe jaǵdaı qyzmeti taratqan aqparat boıynsha, órtten eshkim zardap shekpegen. Aýqymdy órttiń kóbi ıen dalada. Iá, Óskemende tańǵa jýyq azdap jaýyn jaýdy. Bul jalyndy tolyq sóndirmese de, órttiń órshýin basýǵa septigin tıgizdi. Ótken túnde Óskemeniń shetindegi "Sogra" shaǵynaýdanynda qý shóp órtendi. Jel úrlegen jalyn lezde taralyp, sol mańdaǵy sporttyq qural saqtaıtyn qoıma men jeke úıdi de sharpyǵan. Qazir sol nysanǵa qansha shyǵyn kelgeni eseptelip jatyr.