Qańtar oqıǵasy kezinde Almaty áýejaıyna 313 mıllıon teńge shyǵyn kelgen
Almatyda qańtar oqıǵasy kezinde áýejaıǵa shabýyl uıymdastyrdy dep kúdikke ilikkenderge qatysty sot jalǵasyp jatyr. Búgin jábirlenýshi tarap retinde áýejaı ókili kelgen shyǵynyn jarıalady, dep habarlaıdy Almaty-akshamy.kz KTK telearnasyna silteme jasap.
"313 mln 250 myń teńge kóleminde materıaldyq shyǵyn keldi. Kompúterler búlindi. Arnaıy tekseretin qurylǵylar isten shyqty. Ol kúnderi ushý toqtady. Biz aıtyp otyrǵan shyǵyn - joǵaltqan paıdamyz emes. Ol - buzylǵan jabdyqtar. Áýejaı ishindegi qural-jabdyqtardyń talaıy jaramsyz bop qaldy. Sondaı-aq, kúdiktiler aýmaqtaǵy birneshe kólikke mingen. Qyzmetkerlerdiń rasıasy urlanǵan", - dedi Almaty halyqaralyq áýejaıynyń ókili Albert Jazybaev.
Bul iske qatysty 5 azamatqa: Áıgerim Tileýjanovaǵa, Qalas Nurpeıisovke, Nurlan Dalybaevqa, Ermuhamet Shılibaevqa, Janaıdar Karmenovke aıyp taǵylǵan. Beseýi de áýejaıdy basyp alyp, jumysyn toqtatýǵa árekettendi degen kúdikke ilikti.
Tergeý málimetinshe, olar strategıalyq nysanǵa arnaıy baryp, jurtty janyna jınaǵan. Tipti Ujymdyq qaýipsizdik týraly shart uıymynyń jasaǵy mingen ushaqty qondyrmas úshin elektr qýatyn óshirýge talpynǵany týraly prokýrordyń aıyptaý aktinde jazylǵan.