BAQ-tan amerıkalyq jáne qytaılyq platformalardyń ózara básekesi týraly bilip otyramyz. Máselen, Qytaı tarapy nebary 6,5 mıllıon dollarǵa DeepSeek platformasyn jasaǵan. Onyń tıimdiligi mıllıardtaǵan dollar jumsalǵan platformalardan asyp túsken. Bul jóninde «Aıqyn» gazetine bergen «Jaýapkershilik júgi jeńil bolmaıdy» búgingi suhbatynda Memleket basshysynyń keńesshisi – Baspasóz hatshysy Berik Ýálı atap aıtty. «Mine, osyndaı qazirgi zamannyń suranysyn jetik bilip qana qoımaı, ony Qazaqstan qoǵamyna dendep engizý maqsatynda Memleket basshysy jasandy ıntellekti salasyndaǵy ozyq oıly tulǵalarmen jıi kezdesedi. Jýyrda ǵana osy saladaǵy qytaılyq kásipker Lı Kaı Fýdy qabyldaǵan bolatyn. Úkimettiń keńeıtilgen otyrysyndaǵy sózinde de qytaı tájirıbesin keńinen zerdeleý jóninde tapsyrma berýi beker emes. Bul salada biz baǵyndyratyn bıikter áli alda» dedi Prezıdent keńesshisi.
Sıfrlandyrý salasyna myńdaǵan maman daıarlanýda. Atap aıtar bolsaq, Elordada Al-Sana jasandy ıntellektini oqytý ortalyǵy ashyldy. Bul baǵytta júıeli jumys júrgizilýde. Oǵan qosa, jańa qaýip-qaterler de kezigip otyratyny bar. Búginde kıberalaıaqtyqtan qorǵaný máselesi óte ózekti. Máselen, qylmystyq isterdiń 80 paıyzynyń áshkerelenbeýi arnaıy quzyrly organdarymyzdyń sıfrly áleýetin áli de jetildirýin kerek etedi. Óıtkeni memleket úshin azamattardyń qaýipsizdigi eń basty orynda.
Osy oraıda sıfrlandyrýmen ilese kelgen jasandy ıntellekt (JI) –qarqyndy damý ústindegi tehnologıanyń biri. Tipti, bul tehnologıa IT salasymen shektelmeı, shyǵarmashylyq ındýstrıaǵa da aıtarlyqtaı yqpal etýde. Bázbireýler JI-di shyǵarmashylyqqa qaýip retinde qarastyrǵanymen, kópshilik ony jańa múmkindiktiń bastaýy dep biledi. Atalǵan taqyrypta sarapshylardyń naqty pikirin bilip, kreatıvti ındýstrıada JI-men jumys isteıtin mamandarmen keńestik.
Aldymen JI-diń kreatıvti ındýstrıaǵa áserin bilmek boldyq. Almatydaǵy kreatıvti ındýstrıa ókilderimen pikir almasý barysynda olardyń kózqarasy áralýan bolǵanymen, oılary ortaq dep túıdik. Baıqaǵanymyzdaı, jasandy ıntellekt kreatıvti prosesti tolyq almastyra almasa da, ony aıtarlyqtaı ózgerte alatyndaı eken. JI múmkindigi men shekteýin de bilmek boldyq.
Sarapshylardyń pikirinshe, JI shyǵarmashylyq ındýstrıada úsh negizgi baǵytta qoldanylady. Birinshiden, bul – jyldam ıdeıa generasıasy. Dızaında, marketıń pen jarnamada bastapqy ıdeıany jasaýǵa járdemdesedi. Ekinshiden, qaıtalanatyn jumysty avtomattandyrýǵa qajet. Bul degenimiz, montaj, kod jazý, mátindi óńdeý tárizdi tehnıkalyq tapsyrmalardy tıanaqtap, jeńildetedi. Úshinshisi – jeke aýdıtorıaǵa baǵyttalǵan kontent jasaý. Máselen, Netflix jáne Spotify sıaqty platformalar JI-di qoldanýshynyń qalaýyn boljaýǵa paıdalanady.
Degenmen, onyń basty shekteýleri de bar. Bul – shyǵarmashylyqtyń túpki mánin túsinbeýi, jańashyl ıdeıa týdyra almaýy men adam emosıasyn jetkize almaýy. Solaı bola tura, jasandy ıntellekt shyǵarmashylyq salalardy ózinshe túbegeıli ózgertýge tyrysyp baǵýda. Jańa tehnologıa adam balasynyń ornyn basa almasa da, sony múmkindikter týyndatýǵa baryn salýda.
Osy rette kreatıvti ındýstrıa mamandaryna mańyzdysy – JI-di qajetinshe durys paıdalanyp, óz daǵdysyn damytýǵa kirisý. Osy máselerge úńilgendi jón dep taptyq. Al, sizdińshe jasandy ıntellekt shyǵarmashylyqqa kómektese me, álde kedergi keltire me?
· Taqyrypqa oraı
Alıhan TURYSBEK,
grafıkalyq dızaıner:
Ideany tezdetedi
Buryn logotıp jasaýǵa birneshe kún ketse, búginde JI arqyly ıdeıalardy tezirek jasap shyǵýǵa bolady. Sóıtse de, sapaly ónim jasaýǵa adamnyń shyǵarmashylyq túısigi óte kerek. JI usynǵan nusqalar shıki bolyp keledi, ony óńdeý úshin tájirıbe qajet.
Aıdana ÁBDİRAHMANOVA,
kontent-menedjer:
Jýrnalısıkada faktchekıng mańyzdy
JI mátin jazýda da kómektesedi. Biraq onyń jazǵandary kóbinese shablondy bolyp shyǵady. Jýrnalısıkada faktchekıng mańyzdy, al JI áli de jalǵan aqparat taratý qaýpin týdyrady. Sondyqtan ol kómekshi qural retinde ǵana qoldanylýy kerek.