Kúsh qoldanǵan 13 adam polısıaǵa jetkizildi
Shý aýdanynda polısıa qyzmetkerlerine qarsy kúsh qoldanǵan 13 adam polısıaǵa jetkizildi. Olardyń arasynda 2 qyz da bar, dep habarlaıdy Almaty-akshamy.kz QazAqparat-qa silteme jasap.
Aǵymdaǵy jyldyń 7 mamyryna qaraǵan túni Jambyl oblysy Shý aýdanynyń polısıa bólimine bir top adamnyń polısıa qyzmetkerlerine qatysty kúsh qoldanǵany týraly habarlama kelip túsken. Shý qalasynyń kólik beketi mańyndaǵy alańqaı janynda patrúldik polısıa qyzmetkerleri «VAZ-21014» markaly avtokóligin aldyńǵy jaǵynda memlekettik nómiri bolmaǵandyqtan toqtatqany anyqtaldy. Mán-jaıdy anyqtaý barysynda avtomashınanyń júrgizýshisi men jolaýshylary zańdy talaptarǵa baǵynbaı, basqa da tanys adamdarymen birlesip, bılik ókilderine qarsylyq kórsetken. «QR QK 380-babynyń 3-bóligi (bılik ókilderine kúsh qoldaný) boıynsha sotqa deıingi tergeý amaldary bastaldy. Shý aýdanynyń polısıa bólimine 13 adam, onyń ishinde 2 qyz jetkizildi. Qaqtyǵystyń 8 belsendi qatysýshysy ustaldy, 6 adamǵa «kúzetpen ustaý» túrindegi bultartpaý sharasy tańdaldy, al qyzdarǵa qatysty úı qamaǵyna alýǵa sanksıa berildi»,-delingen polısıa departamenti baspasóz qyzmetiniń habarlamasynda. Vedomstvo habarlamasynda qylmystyń taǵy bir belsendi qatysýshysyna qatysty «qamaýda ustaý» túrindegi bultartpaý sharasymen izdeý jarıalanǵandyǵy aıtylǵan. Qazirgi ýaqytta polıseılerdiń densaýlyǵyna zıan keltirý dárejesin anyqtaý maqsatynda sot-medısınalyq saraptamasy taǵaıyndalǵan.