Qazaqstan erler quramasy 5 myń metrge estafetalyq jarysta kúmis júldeger atandy
Kanadanyń Monreal qalasynda short-trekten ótken álem kýbogi kezeńinde Qazaqstan erler quramasy 5 myń metrge estafetalyq jarysta kúmis júldeger atandy, dep habarlaıdy Almaty-akshamy.kz QazAqparatqa silteme jasap.
Quramynda Abzal Ájiǵalıev, Nurtilek Qajyǵalı, Ádil Ǵalıahmetov, Denıs Nıkısha bar qazaqstandyqtar fınalda Italıa, Kanada jáne Ońtústik Koreıa komandalarymen synǵa tústi.
Estafeta qorytyndysynda ońtústikkoreıalyqtar chempıon atansa, qazaqstandyqtar ekinshi, kanadalyqtar úshinshi orynǵa ıe boldy. Penaltı alǵan ıtalıalyqtar jarystan shettetildi.
Jekeleı synda Abzal Ájiǵalıev 500 metr qashyqtyqta medal úshin talasýǵa múmkindik beretin A fınalyna óte almady. Ol V fınalynda ekinshi orynǵa ıe boldy. Al Denıs Nıkısha jartylaı fınalda penaltı alyp, jarys jolynan shyǵyp qaldy.
Áıelder arasynda 3 myń metrlik estafetada Nıderland, Kanada jáne Italıa qyzdary úzdik úshtikke ilikti.
Qazaqstan áıelder quramasy álem kýboginiń Monreal kezeńine qatysqan joq.
Álem kýboginiń kelesi kezeńi AQSH-tyń Solt-Leık-Sıtı qalasynda ótedi. Sondaı-aq jeltoqsan aıynda Almaty qalasyna da kezek tıedi.
Eske sala keteıik, budan buryn short-trekten QR quramasy álem kýbogi kezeńiniń fınalyna ótkenin jazǵan bolatynbyz.