Teorıalyq turǵydan tumaý men koronavırýsty bir ýaqytta juqtyrýǵa bolady, ýaqytyly emdelip, onyń aldyn almasa, saldary aýyr bolmaq, - deıdi Almatydaǵy №4 qalalyq emhananyń ınfeksıonıst-dárigeri Sholpan Áýelbekova.
Sholpan Áýelbekovanyń aıtýynsha, Almatyda maýsymdyq tumaýǵa qatysty ahýal turaqty. Búginde tumaýdyń aýyr túrimen syrqattanǵan naýqastar tirkelgen joq.
«Biz maýsymdyq tumaýǵa daıynbyz. Jyl saıyn epıdemıologıalyq sharalar júrgiziledi. Tumaý men JRVI -diń aldyn alý baǵyttarynyń biri – halyqtyń belgili bir sanatyn qamtıtyn vaksınalaý. Tumaýǵa qarsy dári-dármekter de jetkilikti», - deıdi dáriger.
Spıkerdiń sózinshe, eger koronavırýs pen tumaý bir ýaqytta juqsa, onyń saldary aýyr bolýy múmkin.
«Koronavırýs mehanızminde ımýndyq júıeniń buzylýynan mýltıvaskýlárly sındrom paıda bolady. Bul ınfeksıalardyń kombınasıasy naýqastyń jaǵdaıyn nasharlatýy múmkin», - dep túsindirdi ol.
Sonymen qatar, ol koronavırýs ınfeksıasyn tumaýdan ajyrata alý óte mańyzdy ekenin atap ótti. Óıtkeni bul aýrýlardy emdeý ádisi ártúrli.
«Tumaý ádette jeltoqsan-aqpan aılarynda órshıdi. Tumaý da, koronavırýs ta - jiti juqpaly aýrýlar. Bastapqy kezeńde ekeýiniń belgileri uqsas keledi. Sondaı-aq vırýstardyń ekeýi de aýa-tamshy joly jáne turmystyq baılanys arqyly juǵady. Alaıda, koronavırýs qarapaıym tumaýǵa qaraǵanda – aýyr. Bul indettiń asqyný paıyzy joǵary», - deıdi ınfeksıonıst.
Sóz sońynda dáriger barlyq sanıtarlyq sharalardy saqtaýdy usyndy.
«Betperde rejımi men áleýmettik qashyqtyqty saqtaý qajet. Qoldy jıi jýyp, antıseptık qoldanýdy toqtatpaǵan jón. Eń bastysy, vaksına alý kerek. Bul – aýrýdyń aldyn alýdyń birden-bir joly», - dep qorytyndylady dáriger.