Almaty Memlekettik qýyrshaq teatrynyń repertýary jańa spektáklmen tolyqty.
Kórikti kelbetimen ǵana emes, qýyrshaq ónerinde ozyq baǵytymen erekshelenetin Grýzıanyń astanasy – Tbılısı qalasynan arnaıy shaqyrtylǵan rejıser Nıkoloz Sabashvılı áıgili klasık jazýshy Nıkolaı Gogoldiń «Shınel» povesin teatr tórinde qýyrshaq beınesimen jańasha formatta kórermenge tartý etti.
Almaty Memlekettik qýyrshaq teatry kishkentaı búldirshinderge ǵana emes, sonymen qatar, jasóspirimder men eresekterge de arnalǵan qoıylymdar sahnalaýdy jumys tájirıbesine engizgen bolatyn. Nátıjesinde álemdik jáne otandyq úzdik ádebı jáne dramatýrgıalyq shyǵarmalardan tańdalǵan jańasha formattaǵy «Ana júregi», «Ana – Jer ana», «Romeo men Djýletta», «Makbet. Illúzıa», «Men bir jumbaq adammyn... Abaı», «Ómir-ózen», «Shal men teńiz», «Chempıon» qoıylymdary óner ordasynyń turatqy repertýaryna endi.
Premerasy bolǵan «Shınel» qoıylymy da ózindik ózgeshe rejıserlik sheshimimen, tereń fılosofıalyq astarymen, aıryqsha este qalatyn qýyrshaq obrazymen erekshelenetin spektákl boldy. Qoıylymnyń rejıseri ári sýretshisi – Nıkoloz Sabashvılı, baletmeısteri – Rınat Bılıbaev. Atalmysh qoıylymnyń basty rólin qýyrshaq teatrynyń talantty ári beldi artısi Shohan Qulnazarov somdady.
Rejıser, akter, pedagog, Grýzıa qýyrshaq teatrlar birlestiginiń basshysy Nıkoloz Sabashvılı «Shınel» qoıylymy jaıynda pikir bildirip, Almatydan alǵan áserimen bólisti.
«Barlyǵy da shyǵarmashylyq pikirler men jańa ıdeıalarǵa degen qyzyǵýshylyq nátıjesinde týǵan dostyqtan bastaldy dep aıta alamyn. Bul sapar meniń ásem Almatyǵa kelgen úshinshi tájirıbem. 2023 jyly men «Orteke» qýyrshaq teatrlar festıvalinde Almaty Memlekettik qýyrshaq teatrynyń dırektorymen tanysqan bolatynmyn. Birlesken joba daıyndaý týrasynda birqatar pikirler aıtylyp, Grýzıa qýyrshaq teatrlar birlestigi men Almaty Memlekettik qýyrshaq teatry arasynda yntymaqtastyq memorandýmyna qol qoıyldy. Araǵa bir jyl salyp, jolym ásem Almatyǵa qaıta túsip otyr. Qonaqjaı da darhan peıildi qýyrshaq teatry meni óte jyly qabyldady. Ózińdi erkin ári jaıly sezingen ortada shyǵarmalyq ta ońaı ári qyzyqty órbıdi dep esepteımin. Men qoıylym sahnalaýǵa kelisken sátten durys tańdaý jasaǵanyma kúmándanǵan emes. Nátıjesin patsha kóńildi kórermen baǵalaı jatar», – dedi rejıser.