8 shildeden bastap Qytaı, Úndistan jáne Iran azamattarynyń elimizge 14 kúnge vızasyz kirýine ruqsat berildi, dep habarlaıdy Almaty-akshamy.kz Inform.kz-ke silteme jasap.
Bul jaıynda Qazaqstannyń kóshi-qon komıteti áleýmettik jelide habarlady. Oǵan sensek, 8 shildeden bastap atalǵan elder úshin birjaqty vızasyz rejım engizilip otyr. Úkimettiń tıisti qaýlysy 7 shilde kúni shyqqan. Al Qytaı azamattaryna 72 saǵat vızasyz kirýge berilgen ruqsat kúshin joıady.
Vızasyz rejım talaptaryna sáıkes Úndistan, Iran jáne Qytaı azamattary shekaradan kirgen sátten bastap 14 kún Qazaqstan aýmaǵynda erkin júrip-tura alady. İskerlik, jeke maqsattaǵy, týrısik jáne basqa da saıahattarǵa ruqsat berilgen. Vızasyz rejım boıynsha Qazaqstanda júrip-turǵan jalpy ýaqyt árbir 180 kún kezeń ishinde kúntizbelik 42 kúnnen aspaýǵa tıis.
Bul shartty buzǵan jaǵdaıda sheteldikter mynadaı ákimshilik jaýapkershilikke tartylady:
- 10 AEK-ten 25 AEK-ke deıin aıyppul
- 15 táýlikke deıin qamaý
- Qazaqstan aýmaǵynan tysqary shyǵarý
- 5 jyl Qazaqstanǵa kirýine tyıym salý (sot sheshimi boıynsha).
«Budan basqa, sheteldik azamattarǵa vızasyz rejım aıasynda aqy tólenetin jumys isteýine tyıym salynady. Ondaı jaǵdaıda qabyldaýshy tarap aldyn ala Qazaqstanda jumys isteýge tıisti ruqsatty jáne vızany rásimdeýi qajet» delingen habarlamada.