Qazaqstan azamattary jaqyn mańdaǵy saılaý ýchaskesine aldyn ala habarlasýy kerek
Bıyl naýryz aıynda ótetin saılaýǵa qatysty shetelde 77 daýys berý ýchaskesi ashylady. Bul týraly Syrtqy ister mınıstrliginiń resmı ókili Aıbek Smadıarov málim etti, dep habarlaıdy Almaty-akshamy.kz QazAqparatqa silteme jasap.
«2023 jylǵy 19 naýryzda QR Parlamenti Májilisi men máslıhat depýtattaryn saılaý ótedi. Qazaqstannyń sheteldegi mekemeleriniń janynan, ıaǵnı 62 shet memlekette 77 saılaý ýchaskesi ashylady. Daýys berýge qatysý úshin tıisti shet memlekette turatyn nemese jeke ári qyzmettik, oqý, iskerlik, týrısik maqsatpen júrgen jáne jaramdy pasporty bar Qazaqstan Respýblıkasynyń azamattary elimizdiń dıplomatıalyq nemese konsýldyq ókildigine júgine alady», - dedi resmı ókil vedomstvoda ótken aptalyq brıfıńi barysynda.
Onyń aıtýynsha, sheteldegi saılaý prosesin ýaqytyly jáne tolyqtaı daıyndaý maqsatynda Qazaqstan azamattary jaqyn mańdaǵy saılaý ýchaskesine aldyn ala habarlasyp, saılaýshylar tizimine engizý úshin málimet berýi kerek.
«Ýchaskelerdiń baılanys derekteri Syrtqy ister mınıstrliginiń resmı saıtynda jarıalanady», - dedi A. Smadıarov.