Sherhan Murtazanyń jalǵyz uly Batyljan Sherhanuly qaıtys boldy, - dep habarlaıdy Almaty-akshamy.kz.
Qaraly habardy jýrnalıs Baný Dáýletbaeva estirtti.
"Sherhan Murtazanyń uly qaıtys boldy degen habar jetti. Jalǵyz uly edi. Tulpardyń sońǵy tuıaǵy...", - dep jazdy ol Facebook-tegi paraqshasynda.
Qazaqstan Jazýshylar odaǵy aqparatty rastady.
"Qazaqstannyń Halyq jazýshysy Sherhan Murtazanyń jalǵyz tuıaǵy Batyljan Sherhanuly dúnıeden ozǵany jóninde qaraly habardy jetkizemiz.
Janazasy Samal-1 shaǵynaýdany, №16 úı, 7-páter
2023 jylǵy 28 shilde kúni saǵat 10:00-de shyǵarylady", - dedi odaqtyń ókili.
Jerleý rásimi Almatydaǵy "Keńsaı-2" zıratynda ótedi.
Aıta keteıik, Qazaqstannyń Halyq jazýshysy Sherhan Murtazanyń bir ul, bir qyzy bar. Uly - Batyljan Sherhanuly, qyzy - Alma Sherhanqyzy.
"Aǵam Batyljan Sherhanuly jýrnalısıka fakúltetin qyzyl dıplommen tamamdaǵan. Baspada jumys istep, Baqytjan Momyshuly ekeýi ákemniń "Qyzyl jebesin" aýdardy. Keıinnen aǵam jeke kásippen aınalysyp ketti. Ákem bizge óz shyǵarmalaryn oqýǵa úgittemeıtin.
Ákem jumys bólmesinde jazý jazyp otyrǵanda úıge qonaq kelip qalsa, anamyz "Tsss, jaı júrińizder, aqyryn sóıleńizder" dep júretin. Ondaıda ákem "Emin-erkin otyra berińizder" dep jymıýshy edi. Barlyq aqyn-jazýshylar sıaqty úı sharýasyna ıkemsiz boldy. Biraq bala tárbıesine qatty kóńil bóletin. Aǵamdy sportqa berdi. Ony hokeıge ózi aparyp, ózi alyp keletin", - dep jazǵan Alma Sherhanqyzy estelikterinde.