QR Parlamenti Májilisiniń depýtaty Oljas Quspekov óńirlerge jasaǵan sapary barysynda UQK Shekara qyzmeti Almaty oblysy boıynsha departamentiniń Qarasaı aýdany shekara basqarmasynda boldy.
Halyq qalaýlysyn departament bastyǵy, polkovnık Álibek Qaıýpov qarsy alyp, arnaıy maqsattaǵy utqyr is-qımyldar tobynyń jumysymen tanystyrdy. El shebinde kúrdeli tapsyrmalardy oryndaý úshin jasaqtalǵan toptyń zamanaýı úlgidegi kıimderi men qarý-jaraqtary depýtattyń nazarynan tys qalmady. Budan keıin depýtat tehnıkalyq jáne kásibı daıarlyq bóliminiń kazarmasy men oqý-óndiristik zerthanasyn aralap kórdi.
Departament bastyǵy Álibek Qaıýpov depýtatqa Shekara qyzmetiniń bólimshelerine qajet mamandyq túrlerin daıarlaý kezinde kezdesetin máselelerdi jetkizdi. Kezdesý barysynda shekara basqarmasynyń jylý qazandyǵyn qaıta jańǵyrtý, shekara aýmaǵyn sýmen qamtý jáne káriz júıesine qatysty máseleler qozǵaldy. Sonymen birge, ózderiniń Otan aldyndaǵy boryshyn týǵan eliniń shekarasynda ótegen sarbazdardyń áskerden keıin jumysqa ornalasý múmkindigi de sóz boldy.
Shekara basqarmalarynyń oqý bazasynda jas jaýyngerler kýrsynan ótken sarbazdarǵa mamandyq alǵanyn aıǵaqtaıtyn sertıfıkat beriledi. Alaıda, bul qujat sarbaz áskerden oralǵan soń óziniń kúshin joǵaltady. Polkovnık Álibek Qaıýpov bul máseleni depýtatpen birge talqylady.
– Memleket áskerı qyzmetshilerdiń qyzmetin jaqsartý úshin qoldan kelgenniń barlyǵyn jasaýǵa tıis. Zamanaýı tehnıkalarmen qamtamasyz etýmen birge turmystyq máseleler de nazardan tys qalmaýy kerek. Shekarada sapaly jáne qaýipsiz qyzmet atqarý úshin barlyq jaǵdaı bolýy qajet, – dep atap ótti Oljas Quspekov.
Shekaramyzdyń tynyshtyǵyn kúzetip júrgen shekarashylardyń áleýmettik-turmystyq jaǵdaıy syn kótermeıtinin buǵan deıin de depýtattar talaı ret kótergen edi. Ásirese, shilińgir shilde men qaqaǵan qańtarda jumys isteıtin shekarashylardyń jaǵdaıyn jaqsartý baǵytynda naqty qadamdar jasalýy qajet.