Egistik alqaptarynda shegirtke qaptap, sharýalardy shash etekten shyǵynǵa batyrýy múmkin. Sebebi, bıyl zıankester eń kóp taralady degen qaýip bar.
Bul týraly Úkimet otyrysynda aıtylyp, máseleniń aldyn alý tetikteri qaraldy, dep habarlaıdy Almaty-akshamy.kz.
Premer-Mınıstr bul máselege qatań jaýapkershilikpen qaraý qajet dedi. Sondyqtan Aýyl sharýashylyǵy mınıstrligine oblys ákimdikterimen birlesip, zıankesterdiń taralý oryndaryn anyqtaýǵa qosymsha resýrstardy jumyldyrýdy jáne óńdeý jumystaryn baqylaýǵa alýdy tapsyrdy. Ol úshin búdjetten 8 mlrd teńge bólindi. Sondaı-aq, jıynda kóktemgi egis jumystarynyń jaıy da pysyqtaldy. Bıyl 23 mln gektar aýmaqqa egin egilmek. Aýyl sharýashylyǵy mınıstriniń aıtýynsha, sharýalarǵa dızel otyny jetkilikti. Dala jumystaryna 140 mıllıard teńge qarastyrylǵan. Úkimet basshysy bólingen qarjy men sýbsıdıalardyń maqsatty jumsalýyn qatań baqylaýdy da typsyrdy.
Sýbsıdıalardy bólý boıynsha barlyq quqyqtar ákimdikterge berilgendikten, Sizge, Aıdarbek Seıpiluly, ákimdermen birlesip, sharýalarǵa tıesili sýbsıdıalardy ádiletti jáne tıimdi bólý máselesin qatań baqylaýǵa alý qajet. Qarjy osy saladaǵy iri oıynshylardyń tabys kózine emes, aýyl turǵyndarynyń múmkindikterin keńeıtip, shyǵarylatyn ónim kólemin arttyrýǵa yqpal etýi tıis, - deıdi QR Premer mınıstri Oljas Bektenov.