Sharýalardy zamanaýı sý únemdeý tehnologıalaryn qoldanýǵa yntalandyrý úshin memlekettik qoldaý sharalary kózdelgen.
Bul týraly QR Aýyl sharýashylyǵy mınıstri Erbol Qarashókeev aıtyp berdi, dep habarlaıdy Almaty-akshamy.kz QazAqparatqa silteme jasap.
«Sýarmaly eginshilikti damytý sýarýdyń sý únemdeý tehnologıalaryn keńinen engizý arqyly qamtamasyz etiledi. Máselen, sharýalardy zamanaýı sý únemdeý tehnologıalaryn qoldanýǵa yntalandyrý maqsatynda zamanaýı sýarý júıesin satyp alýǵa jáne qajetti búkil ınfraqurylymdy júrgizýge jumsalǵan shyǵyndardyń 50% óteýdi kózdeıtin ınvestısıalyq sýbsıdıalaý túrindegi memlekettik qoldaý bar. Bul maqsattar úshin oblystardyń ótinimderi boıynsha bıyl 268 jobany iske asyrylady, oǵan 16,6 mlrd teńge kózdelgen», - dedi Aýyl sharýashylyǵy mınıstri Úkimettiń búgingi otyrysynda.
Sondaı-aq aýyl sharýashylyǵy taýaryn óndirýshilerge sý berý qyzmetiniń quny sýbsıdıalanyp jatyr. Onda sýdyń bir tekshe metrine bólinetin sýbsıdıa mólsheri tarıfterden paıyzdyq qatynasta 50%-dan 80%-ǵa deıin arzandatylady. Bul maqsatqa 2,7 mlrd teńge kózdelgen.
«Fermerlerdi sý únemdeý tehnologıasyn engizýge yntalandyrý úshin qazir sý berý qyzmetin óteý jónindegi sýbsıdıany sýarý tásilderine qaraı saralaý jumysy júrip jatyr. Iaǵnı burynǵy deńgeıdegi sýbsıdıany sý únemdeý tehnologıasyn qoldanatyn fermerler ǵana alady», - dedi Erbol Qarashókeev.