Qarttar aılyǵynyń aıasynda «Shańyraq» áleýmettik qyzmet kórsetý ortalyǵynda «Qarttaryn qadirlegen el ardaqty» atty ádemi kesh ótti.
Bul kúni atalmysh ortalyqqa Alataý aýdanyndaǵy №212 mektep-gımnazıanyń oqýshylary men ustazdary arnaıy kelip, óz ónerlerin kórsetti. Ustazdardyń áýelete salǵan ásem áýeni men balalardyń óneri «Shańyraq» áleýmettik qyzmet kórsetý ortalyǵynda turyp jatqan 302 qarıanyń kóńilin kóterip, olardy bir serpiltip tastady.
«Birtutas tárbıe baǵdarlamasy» aıasynda uıymdastyrylǵan sharanyń basty maqsaty – ulttyq qundylyqtarymyzdy dáripteý jáne qarıalarymyzdy qurmetteý. Sonymen qatar, jas urpaq boıyna adamgershilik, otansúıgishtik, izgilik sıaqty adamı qasıetterdi sińirip, olardy ımandylyqqa tárbıeleý boldy.
– Qarıalarymyzdyń kóńili kóterilip, qýanyp qaldy. Oqýshylarymyzdyń oryndaǵan ánderi men bıleri qarıalardyń kóńilinen shyǵyp, olardan aq batalaryn aldyq. Osyndaı sharalar arqyly biz de jas urpaq boıyna ulttyq qundylyqtardy sińirýge tyrysamyz. Sonymen qatar, mektep muǵalimderi qaıyrymdylyq tanytyp, 200 myń teńgege qarıalarǵa qajetti dári-dármekterdi ákelip berdik. Biz aǵymdaǵy oqý jylynda jumysyn bastaǵan jańa mekteppiz. Soǵan qaramastan, biz qala ómirindegi barlyq is-sharalarǵa belsene qatysyp jatyrmyz. Máselen, Jambyl aýdanyndaǵy Uzynaǵash óner mektebimen yntymaqtastyq jónindegi memorandýmǵa qol qoıdyq. Olar da búgin kelip, ónerlerin kórsetýde, – deıdi №212 mektep dırektorynyń beıindik oqytý jónindegi orynbasary Araı Ómirbekqyzy.
