Jansaıa Ábdimálik tórt dúrkin álem chempıonyn utty
Shahmattan Qazaqstan quramasy Búkilálemdik onlaın-olımpıadadaǵy joǵary dıvızıonda kósh bastap tur. Onyń ústine komanda qytaılyqtardy, al Jansaıa Ábdimálik tórt dúrkin álem chempıony Hoý Ifandy utty. Taǵy bir qazaqstandyq Bıbisara Asaýbaeva týrnırdegi alty oıyndy da jeńdi, dep habarlaıdy Almaty-akshamy.kz.
Qazaqstannyń Qytaıǵa qarsy oıyny onlaın-olımpıadanyń tórtinshi kezeńinde ótti. Onda shahmatshylar alty oıynnyń úsheýinde jeńiske jetip, taǵy bireýin teń aıaqtaǵan - 3,5-2,5. Ábdimálik pen Asaýbaevadan basqa Ramazan Jalmahanov ta jeńiske jetti.
Birinshi kezeńde Qazaqstan Grýzıany jeńdi - 4,5-1,5. Denıs Mahnev, Dınara Sádýaqasova jáne Asaýbaeva Jalmahanovpen birge jeńiske jetti.
Ekinshi kezeńde Qazaqstan quramasy Sádýaqasova men Asaýbaevanyń jeńisi arqasynda Indonezıadan 3,5-2,5 esebimen basym tústi.
Úshinshi kezeńde Rýmynıa jeńildi - 4-2, al Asaýbaeva men Jalmahanov jeńiske jetti.
Besinshi kezeńde qazaqstandyq shahmatshylar Armenıany 3,5-2,5 esebimen jeńdi. Jeńimpaz partıalar Rınat Jumabaev, Ábdimálik pen Asaýbaeva aktıvine jazyldy.
Al, altynshy kezeńde Qazaqstan quramasy Grekıany jeńdi - 5,5-0,5. Jeńis Rústem Hýsnýtdınov, Ábdimálik, Gúlisqan Nahbaeva, Qazybek Nógerbek jáne Asaýbaevanyń esebinde.
Endi Qazaqstan onlaın-olımpıadada top-dıvızıonda 12 upaımen kósh bastap, Qytaıdy eki upaımen basyp ozdy. Qazaqstandyq shahmatshylar Iran, Mońǵolıa jáne Avstralıamen taǵy úsh oıyn ótkizedi.
Onlaın-olımpıadada joǵary dıvızıonnyń 40 komandasy tórt topqa bólingen, olardyń árqaısysynda aınalym boıynsha týrnır ótedi. Ár toptan úzdik úshtik irikteý kezeńi, shırek fınal, jartylaı fınal jáne fınaldan turatyn pleı-off kezeńine ótedi. Shahmattan onlaın álem olımpıadasy Chess.com oıyn alańynda qashyqtan ótedi. Ol 15 qyrkúıekte aıaqtalady.
Qazaqstan quramasynyń negizgi quramyna: Rınat Jumabaev (halyqaralyq grosmeıster), Denıs Mahnev (halyqaralyq grosmeıster), Jansaıa Ábdimálik (halyqaralyq grosmeıster), Dınara Sádýaqasova (Halyqaralyq áıelder grosmeısteri), Ramazan Jalmahanov (halyqaralyq sheber) jáne Bıbisara Asaýbaeva (halyqaralyq áıelder grosmeısteri) kiredi.
Qosalqy oıynshylar: Rústem Hýsnýtdınov (halyqaralyq grosmeıster), Mýrtas Qajgaleev (halyqaralyq grosmeıster), Gúlisqan Nahbaeva (Halyqaralyq áıelder grosmeısteri), Gúlmıra Daýletova (Halyqaralyq áıelder grosmeısteri), Qazybek Nógerbek (FIDE sheberi) jáne Merýert Qamalıdenova (Halyqaralyq áıelder sheberi). Komanda kapıtany - halyqaralyq grosmeıster Pavel Kosýr.