5 tamyzda Qazaqstan áıelder quramasy Vetnammen oınaıdy
Qazaqstan áıelder quramasy Úndistanda ótip jatqan Shahmat olımpıadasynda Ázirbaıjanǵa ese jiberdi. Bul - qazaqstandyq shahmatshylardyń atalǵan saıystaǵy alǵashqy jeńilisi, dep habarlaıdy Almaty-akshamy.kz QazAqparatqa silteme jasap.
«Sport Shredıngera» telegram -kanalynyń habarlaýynsha, áıelder quramasy Ázirbaıjan komandasynan 1:3 esebimen utylǵan. Al, Jansaıa Ábdimálik pen Bıbisara Asaýbaeva qarsylastarymen teń tússe, Ksenıa Balabaeva men Gúlisqan Nahbaeva jeńilis tapty.
Osylaısha, áıelder quramasynyń enshisinde 4 jeńis, 1 teń oıyn jáne 1 jeńilis bar. Bul kórsetkishpen qazaqstandyq komanda Úndistandaǵy Dúnıejúzilik shahmat olımpıadasynyń týrnır kestesinde 6-orynnan 14-orynǵa syrǵydy.
Búgin - sportshylar úshin demalys kúni. Keıin 5 tamyzda Qazaqstan áıelder quramasy Vetnammen oınaıdy.
Eske salsaq, keshe Shahmat olımpıadasynda Qazaqstan erler quramasy Chehıany 2,5:1,5 esebimen utqanyn jazyp edik.