Almatyda PIK-tiń MIB-ge aýysýy belsendi qarqynmen júrýde
Bul týraly Óńirlik komýnıkasıalar qyzmetiniń baspasóz konferensıasy barysynda qala ákiminiń orynbasary Serik Qusaıynov habarlady. Onyń aıtýynsha, eger buryn megapolıs turǵyndary ádettegi PIK-ten bas tartýǵa asyqpasa, qazir úılerdi basqarý nysanyn jappaı ózgertip jatyr, dep habarlaıdy Almaty-akshamy.kz
Eske salsaq, Almatyda «bir úı – bir birlestik – bir shot» qaǵıdaty boıynsha menshik ıeleri birlestikteriniń ınstıtýty engizilýde. Memleket basshysy Qazaqstan halqyna Joldaýynda reformany júzege asyrýdyń mańyzdylyǵyn atap ótti.
Almaty ákiminiń orynbasary S. Qusaıynov atap ótkendeı, qalada MIB jáne JS-ge kóshý jumystary belsendi qarqynmen júrgizilýde.
«Turǵyn úı-kommýnaldyq sharýashylyq salasyn qaıta júkteý qajettigi burynnan pisip-jetildi. Kóp jyldar boıy jumys istep kele jatqan PIK-ter kooperatıv tóraǵalarynyń jumysy sıaqty úı turǵyndary tarapynan kóptegen narazylyqtar týǵyzdy» , - dep habarlady qala ákiminiń orynbasary.
Ol basqarýdyń jańa formalarynyń kóptegen artyqshylyqtary bar ekenine senimdi: tóraǵany bir jylǵa ǵana tańdaý múmkindiginen bastap, turǵyndar jınaǵan qarajatty paıdalanýdyń ashyqtyǵyna deıin.
Almatyda 8 645 kóppáterli turǵyn úı bar, olarǵa ázirge 820 basqarý organdary (PIK, TK, PITK jáne t.b.) qyzmet kórsetedi. Alaıda, 2022 jyldyń shildesine deıin barlyǵy MIB nemese JS-ǵa kóshý týraly sheshim qabyldaýlary tıis. Ol úshin Almatyda ákimdikterdiń qyzmetkerlerinen turatyn segiz mobıldi top qurylyp, olar turǵyndarmen jınalys ótkizip, aqparattandyrady. Jyl basynan beri 2500 kópqabatty úıdiń turǵyndarymen 800 jınalys ótti.
«Búginde múlik ıeleriniń 623 birlestigi (MIB) tirkelip, 2 185 jaı seriktestik (JS) tańdaldy. Almaty qalasy boıynsha barlyǵy 3 001 kópqabatty úıdi qamtıtyn basqarýdyń 2 808 jańa nysany tirkelgen, bul 40%-dy quraıdy» , - dep habarlady S. Qusaıynov.
Aıta keterligi, MIB jáne JS-ke kóshken páter ıeleri úıge qyzmet kórsetýdiń qandaı tarıfin, turǵyn emes úı-jaılardy qalaı paıdalaný kerektigin jáne t. b. tańdaı alady.