Ońtústikte úzdik serjanttar anyqtaldy
Ulttyq ulannyń 5574 áskerı bóliminiń jaýyngerlik jáne ádistemelik daıyndyq ortalyǵynda «Ońtústik» óńirlik qolbasshylyǵyna qarasty áskerı bólimderdiń serjanttary arasynda «Úzdik vzvod serjanty – jaýyngerlik daıyndyq boıynsha nusqaýshy» jáne «Úzdik bólimshe komandıri» baıqaý saıysynyń İİ kezeńi ótti, dep habarlaıdy almaty-akshamy.kz.
Saıysqa Almaty, Jambyl, Qyzylorda, Jetisý oblystary men Almaty jáne Shymkent qalalarynan kelgen 18 serjant qatysty. Baıqaýdyń negizgi mindetteri men maqsattary kishi komandırlerdiń áskerı-kásibı sheberlikterin jetildirý, ozyq úlgidegi tájirıbeni, jumys jasaý stıli men ádis-tásilderdi zerdeleý, biriktirý jáne taratý bolyp tabylady. Odan basqa, konkýrs barysynda áskerı-kásibı turǵyda anaǵurlym daıyndalǵan serjanttar men bólimshe komandırleri aıqyndalady.
Jarys barysynda óz bólimderinde úzdik dep tanylǵan qatysýshylar kásibı serjant jáne kishi komandırlerge tán barlyq qabiletterin kórsetti: onyń ishinde dene shynyqtyrýdaǵy tózimdilik, oq atýdaǵy dáldik, hımıalyq qorǵaný quraldaryn qoldaný, memlekettik-quqyqtyq daıarlyq, saptyq daıyndyqtyń úzdik daǵdylary jáne basshylyq qujattardy bilý baǵytynda tekserildi.
Serjanttar korpýsy – kásibı armıanyń negizi. Áskerı daıyndyq, bólimshelerdegi áskerı tártiptiń jaǵdaıy jáne jeke quramnyń moraldyq-jaýyngerlik rýhy kóbinese serjanttardyń kásibı sheberligine baılanysty. Osyndaı saıysty ótkizý serjanttar quramynyń kásibı sheberligin arttyrýǵa yqpal etip, bul úrdistegi jarys rýhyn nyǵaıtady. Áskerı bólimderdegi kishi komandırlerdiń daıarlyq deńgeıin baǵalaýǵa múmkindik beredi, - deıdi «Ońtústik» óńirlik qolbasshylyǵy qolbasshysynyń orynbasary polkovnık Konstantın Kýatov.
Baıqaý saıysynyń jalpy nátıjesi boıynsha, Taraz qalasyndaǵy 5513 áskerı bóliminiń aǵa serjanty Meırambek Qydyrmuhametov óńirlik qolbasshylyqtyń úzdik vzvod serjanty ataǵyna ıe boldy. Al úzdik bólimshe komandıri ataǵy Shymkent qalasyndaǵy 6506 áskerı bóliminiń aǵa serjanty Toqtar Qasymhanǵa buıyrdy.
Jeńimpazdar men júldegerler «Ońtústik» óńirlik qolbasshylyǵynyń qolbasshysy general-maıor Talapker Ámireevtiń atynan arnaıy dıplom, kýboktar jáne baǵaly syılyqtarmen marapattaldy.
