Almatyda Kazakhstan Fashion Week ulttyq sán aptalyǵynyń 32-maýsymy aıaqtaldy. Onda otandyq jáne sheteldik 17 dızaıner óz toptamalaryn usyndy, dep habarlaıdy Almaty-akshamy.kz. aikyn.kz-ke silteme jasap.
Bul jolǵy aptalyqtyń taqyryby qonaqtarǵa á degennen-aq belgili boldy: podıým aınalasyna tigilgen aqshańqan kıiz úıler men dekoratıvti aǵash-butalar is-sharanyń kórkin keltirdi. Kazakhstan Fashion Week jobasynyń negizin salýshy ári art-dırektory Alekseı Chjeı túp-tamyrymyzǵa tereńinen úńiletinimizdi, sondyqtan toptamalarda, bezendirýde, sondaı-aq stılızasıada etnıkalyq elementter basym bolatynyn málimdedi. Sán kórsetilimine kelgen qonaqtardyń ózi biri taqıasyn, biri shapanyn kıip, endi biri ulttyq áshekeıin taǵyp kelgen.
Ulttyq sán aptalyǵynyń 32-maýsymynda halyqaralyq baıqaýlardyń laýreaty, modeler Adılá Botabaeva Qazaqstandaǵy alǵashqy transformerler brendi YANG LAIN-niń «Ozgeshe» toptamasymen jurtshylyqty tańǵaldyrdy. Toptamanyń ataýy jaıdan-jaı tańdalmaǵan eken. Yang Lain sózi malaı tilinen qazaq tiline aýdarǵanda «eshkimge uqsamaıtyn» degen maǵynany bildiredi. Kóshpendiler beınesinen shabyt alǵan dızaıner qazaq mádenıetiniń zamanaýı ınterpretasıadaǵy keıpi bolyp sanalatyn 12 transformer beınesin jasaǵan.
«Brend tujyrymdamasy óndirýshiniń de, tutynýshynyń da sanaly bolýyn kózdeıdi. Fýnksıonaldy transformerlerdi jasaý – bul sán ındýstrıasynyń qorshaǵan ortaǵa teris áserin azaıtýdyń amaly. Bul toptamada kıimniń bir bóligin nemese aksesýardy birneshe túrde qoldanýǵa bolady. Jańa toptamada barlyq buıym Zero-Waste ádisimen jasalǵan: matanyń qaldyqtary da kádege jaratyldy», – dep atap ótti dızaıner.
Brendtiń atap ótetin taǵy bir ereksheligi – avtorlyq prıntter. Jańa toptama arqyly dızaıner Adılá Botabaeva tabıǵatpen tereń baılanysy bar qazaq mádenıetiniń fılosofıasyn jetkizgisi keletinin aıtty. Prınttiń negizgi elementi – túıe.
Sán aptalyǵynda Zalkar brendiniń «Aıan» toptamasy da kózge tústi. Brend dızaıneri Zalqar Asqaralıevtiń aıtýynsha, toptamadaǵy barlyq kıim zyǵyr jáne maqta sekildi tabıǵı matalardan tigilgen.
Al elordalyq tanymal dızaıner Dınara Satjan Kazakhstan Fashion Week sán aptalyǵynda etno-stılde keskindelgen toptamasyn usyndy. Jibek mata men kıizdiń kúrdeli úılesimi kórermendi beı-jaı qaldyrmady.
Aıtpaqshy, bul is-sharada bıylǵy eń sándi tús te ataldy. Shara qatysýshysy áıgili dızaıner Aıda Kaýmenova óz toptamasynda tańqýraı tústes kıimderdi usyndy. Dızaınerdiń sózinshe, Viva Magenta 18-750 dep atalatyn bul tús bıyl sánde. Ol shynaıy qýanyshty, ózin-ózi tanytý erkindigin, optımızmdi jáne shabytty bildiredi. Aıta ketý kerek, jyldyń úzdik túsin amerıkalyq Pantone ınstıtýty arnaıy zertteýlerge súıene otyryp belgileıdi.
Eske sala keteıik, Kazakhstan Fashion Week ulttyq sán aptalyǵy 2004 jyldan bastap ótkizilip keledi. Elimizdiń basty podıýmy respýblıkany ǵana emes, shet eldi moıyndatqan birqatar otandyq dızaınerdiń baǵyn ashty.