Almaty qalasynyń ákimdigi memlekettik satyp alýlarǵa qatysatyn merdiger uıymdarǵa qoıylatyn talaptardy qatańdatady. Qala bıligi merzimdi buzatyn, standartty saqtamaıtyn, óz mindetin oryndamaıtyn kompanıalardy jumysqa aralastyrmaýdy kózdep otyr.
Baqylaýdy kúsheıtýmen qatar, respýblıka deńgeıinde satyp alý erejelerine ózgerister engizildi, bul kezdeısoq jáne álsiz kompanıalardy tenderden shettetýge múmkindik bermek. Sonymen qatar, senimsiz jetkizýshilerge aıyppul salyp, shekteýdi qatańdatýdy kózdeıtin usynys jasap jatyr. Óńirlik komýnıkasıalar qyzmetindegi baspasóz máslıhatynda osyndaı oı aıtyldy.
«Biz adal bızneske bar jaǵdaıdy jasaımyz. Almatyda adal merdigerler jumys isteýi kerek. Mindettemesin, merzimi bolsyn, sapasy bolsyn, oryndamaıtyn kez kelgen kompanıany biz qoshtamaımyz. Aqsha taýyp, "haltýra" jasaǵysy keletin merdigerler bul jerde tabys taba almaıdy. Olarǵa talap kúsheıedi. Biraq adal bıznesti biz árdaıym qoldaımyz», — deıdi qala ákiminiń orynbasary Oljas Smaǵulov.
Bıylǵy 9 aıda Almatyda Biryńǵaı satyp alýlardy uıymdastyrýshy jalpy somasy 752,6 mıllıard teńgege 1 274 baıqaý ótkizgen. Onyń 491 mıllıard teńgesi qurylys pen ınfraqurylymdyq jumystarǵa tıesili. Biraq merdigerdiń keıbiri isti ıgere almaı, tapsyrysty úshinshi bireýge ótkizip, jumysqa kesirin tıgizgen. Bılik mundaı kompanıalardyń bolashaqtaǵy baıqaýǵa qatysýyna shekteý qoıyp, baqylaýdy kúsheıte túspek.
«Mindetin durys oryndamaǵan merdigerler biraz áýreledi bıyl bizdi. Buǵan tenderde kompanıalardyń jalpy tájirıbesi eskerilip, nysannyń kúrdeliligin saralamaǵany sebep bolǵan. Buryn shaǵyn jumys istegen kompanıalar úlken jobalardy jeńip aldy. Mınıstrlik keıin erejege ózgeris engizdi: endi tájirıbege saralanǵan tásil qoldanylyp, memlekettik satyp alýǵa qatysýy naqty eskeriletin bolady», — dedi Memlekettik aktıvter basqarmasynyń basshysy Erkinbek Ámirǵalıev.
Almaty qalasy Qarjy mınıstrligine birqatar usynys joldady:
* Qurylys jumysy boıynsha avanstyq tólemdi tapsyrys berýshiniń quqyǵy retinde qarastyrý (qazirgi kezde bul mindetti shart),
* Senimsiz jetkizýshiniń tiziminde bolýdy 2 jyldan 3 jylǵa deıin uzartý,
* Aıyppuldy arttyrý. Qazirgi kezde aıyppul kólemi tek 0,01 % bolǵandyqtan, bul tıimsizdeý bolyp tur. Almaty bıligi ony shart somasynyń 25 % deıin arttyrmaq oıda.
«Búdjettiń ár teńgesi tıimdi jumsalýy tıis, bul qaǵıda Almatyda naqty jumys istep tur», — dep atap ótti ákimdik ókilderi.