Bıyl ūly dala ruhynyń shamshyraǵy, qazaq ruhanıyatynyń temírqazyǵy, ūly aqyn, oıshyl-ǵūlama Abaı Qūnanbaıūlynyń tuǵanyna 180 jyl tolyp otyr. Osy mereıtoı ayasynda elímízdíń ár óńírínde Abaı mūrasyn dárípteuge arnalǵan ǵylymı-tanymdyq, ruhanı-aǵartushylyq ís-sharalar keńínen ótkízílíp keledí.
Osyndaı taǵylymy mol ís-sharalardyń bírí – №202 mektep-gımnazıyasynyń ūıymdastyruymen ótken «Adamzattyń Abaıy» atty audandyq semınar. Semınarǵa Áuezov audanynyń kítaphana basshylary men audandaǵy 32 mekteptíń kítaphana qyzmetkerlerí jáne ūstazdar qauymy qatysty.
Jıynnyń maqsaty – oıshyl, kemeńger tūlǵa Abaıdy tereń tanu, onyń mūrasyn nasıhattau, jastardyń júregíne síńíru, oqyrman sanasyna jetkízu jáne adamdyqtyń bıík úlgísíne ūmtylu boldy.
Abaıdyń oılary tek qazaq qoǵamyna emes, búkíl álem jūrtshylyǵyna ortaq. Ol adam balasyn ūltqa, dínge, násílge bólmeı, «Adamzattyń bárín súı, bauyrym dep» degen gumanıstík ıdeyasyn ūsyndy. Būl ūstanym búgíngí jahandanu dáuírínde asa ózektí. Qazírgí qazaq elíníń ruhanı damuy men ūlttyq jańǵyruynyń negízínde de Abaı mūrasy jatyr.
Prezıdent Qasym-Jomart Toqaevtyń:
«Abaıdyń oı-tūjyrymdary jańa Qazaqstan qoǵamynyń qaǵıdattarymen úndes», –
degen sózí sonyń dálelí.
Ūly Abaıdyń ıdeyalaryn ūjymdyq ruh pen tárbıeníń tíregíne aınaldyru jolynda eńbek etíp júrgen mektep dırektory Bolat Janaıhanūly «Kítaphana – bílím men mádenıettíń qaınar kózí» degen ūstanymdy basshylyqqa ala otyryp, bıylǵy oqu jylyn jańa jetístíkpen qarsy aldy. Ol mektep kítaphanasyn zamanauı úlgíde jabdyqtauǵa qol jetkízdí.
Búgíngídeı aqparat tasqyny zamanynda «kítap – adamnyń aqyl-oıyn damytatyn eń jaqsy dos» ekenín jas jetkínshekterdíń sanasyna síńíru maqsatynda júıelí jūmystar júrgízílíp keledí. Sonyń bírí – audandyq semınardy mektep dırektory Bolat Janaıhan ashty.
Abaıdyń árbír tuyndysy – tereń oıdyń, sheksíz bílímníń jáne ūlt ruhynyń kórínísí. Semınar barysynda qatysushylarǵa Abaıdyń ómírí men shyǵarmashylyǵyna arnalǵan beınerolık ūsynyldy.
Abaı – tek aqyn ǵana emes, ol – sazger. Onyń mūńly da syrly áuenderí júrekke jol tauyp, halyq jadynda saqtalyp keledí. Oqushylar oryndaǵan Abaı ánderínen qūralǵan popurrı men «Men jazbaımyn óleńdí ermek úshín» atty poezıya mınutyndaǵy Abaı óleńderí qatysushylardyń zor yqylasyna bólendí.
Ūly aqynǵa degen halyqtyń qūrmetí men súıíspenshílígí eshqashan sóngen emes. Abaıdyń dana sózderí – ár qazaqtyń júregínde.
Ūly oıshylǵa degen yqylas pen qūrmettíń belgísí retínde mektep maqtanyshy, ekí dúrkín respublıkalyq ǵylymı joba baıqauynyń jeńímpazy, «Almaty daryny» ortalyǵynyń ambassadory Temírhan Aıbar oqyǵan Abaıǵa arnalǵan arnau óleń erekshe áser qaldyrdy. Sondaı-aq 7-synyp oqushysy Zeınolda Arujannyń jetígen aspabynyń súıemeldeuímen oryndaǵan «Jelsíz túnde jaryq aı» ání men «Serper» dombyrashylar ansamblíníń oryndauyndaǵy «Erke sylqym» kúıí qonaqtarǵa erekshe áser syılady.
Ís-sharada kítaphana meńgerushísí Janbolatova Sáulesh «Adamzattyń Abaıy», al qazaq tílí men ádebıetí páníníń mūǵalímí Elshíbaeva Ǵalıya «Abaı ílímí jasandy ıntellekt álemínde» taqyryptarynda bayandamalar jasady. Olar Abaı danalyǵynyń qazírgí qoǵam damuyndaǵy mańyzyn aıshyqtady. Ásírese, jasandy ıntellekt ūsynǵan «Ūly Abaıdyń kítaphanashyǵa amanaty» atty kítapsha semınar qatysushylarynyń erekshe qyzyǵushylyǵyn tudyrdy — ár kítaphanashy Abaı ruhymen tíldeskendeı áser aldy.
Hakím Abaıdyń 180 jyldyǵyna arnalǵan būl shara – kezektí jıyn emes, ár qatysushy úshín ruhanı ósu men bıíkteuge jol ashqan taǵylymdy basqosu boldy.
Bíz ūly tūlǵanyń mūrasyn jas ūrpaqqa nasıhattaı otyryp, ózímízdí de, qoǵamdy da tárbıeleımíz. Abaıdyń ár sózí, ár óleńí – adamdyqtyń aınasy.
Sondyqtan árbír ūstaz ben kítaphanashy – Abaıdy tanytushy, Abaıdy tíríltushí boluy tıís.
Búgíngí ūrpaq Abaıdy tanu arqyly óz bolmysyn, óz ūltynyń asyl qazynasyn tanıdy.
Elshíbaeva Ǵalıya, Almaty qalasy,Áuezov audany, №202 mektep-gımnazıyasynyń qazaq tílí men ádebıetí páníníń mūǵalímí