Bir mekteptegi ózgerý tarıhy 2025 jyldyń qańtarynda Shyǵys Qazaqstan oblysynyń Glýbokov aýdanyna qarasty iri orta mektepterdiń birinde erekshe bastama qolǵa alyndy.
Aýdandyq prokýratýra bilim bólimi men mektep ákimshiliginiń belsendi qoldaýymen ómirlik qıyndyqqa tap bolǵan jasóspirimderdi óz qamqorlyǵyna aldy. Osylaısha «Kúsh-birlikte» dep atalatyn kóshbasshylar klýby dúnıege keldi. Eń bastysy — 7–8-synyptyń 23 oqýshysyna jańa tynys ashyldy.
Kúdiktenip qaraǵannan góri, senim artty. Túzetýge tyrysqannan góri, qoldaý kórsetti. Olardy sportqa, shyǵarmashylyqqa, birlesken isterge jumyldyrdy.
Nátıjesinde úsh aıdyń ishinde tártip buzýshylyqtyń ornyna – jetistikter, nemquraıdylyqtyń ornyna – belsendilik, tuıyqtyqtyń ornyna – sahnada jarqyraǵan óner keldi.
Taǵy bir aıryqsha jaıt – prokýrordyń qatysýy resmı jıyndarmen shektelip qalmaýy. Ol negizgi jumysynan qoly bosasa boldy, mektepke baryp, balalarmen áńgimelesti, tenıs jáne basqa sport túrlerin birge oınady, ómirlik tájirıbesimen bólisti.
Balǵyn júrekterge dál osyndaı qarapaıym da shynaıy sátterdiń áseri mol boldy. Olar rasymen senimge ıe ekenin, jandarynda kómek qolyn sozýǵa daıar eresekter bar ekenin uǵyndy.
Al bul bastamanyń sátti júzege asýyna mektep dırektory men muǵalimderdiń qosqan úlesi ólsheýsiz. Balalar úshin qolaıly orta jasalyp, ózin qajetti, estigen, qabyldanǵan kúıde sezinýine bar jaǵdaı jasaldy.
Oqýshylar óz kúshterimen «Naýryz – Meıirim men birliktiń merekesi» atty mekteptik sharany uıymdastyryp, ár jasóspirimge qajetti dúnıeniń bir ǵana múmkindik pen oǵan degen senim ekenin dáleldedi.
Jeke ózimniń oıym: eresekter shynaıy qamqorlyq kórsetkende – tek balalar ǵana ózgermeıdi, ózimiz de túbegeıli transformasıaǵa ushyraımyz. Sebebi júregimizdegi izgilikke, meıirimge degen senimimiz jańǵyrady. «Máselesi kóp» dep júrgen bul jetkinshekter, shyn máninde, bizden tek túsinistik pen yqylasty kútken eken.
Búgingi tańda klýb músheleri óz mektebiniń kóshbasshylaryna aınaldy. Al «Kúsh - birlikte» bastamasy aldymen aýdan deńgeıinde, keıin búkil óńirde taratylýǵa daıyndalyp jatyr.
Bul tájirıbe shynymen shabyttandyrady. Meniń senimim: erteńgi qýatty urpaqty tárbıelegimiz kelse, eń aldymen olarǵa qajettiligin sezindirý kerek. Qorqytyp emes, qoldaý arqyly.
Buıyryp emes, kóńil bólý arqyly. Osy jobanyń jetistigi eskerilip, men ony basqa óńirlerde de júzege asyrýdy tapsyrdym. Ol jaqta da prokýrorlar naqty mektepterge qamqorlyq jasap, ár balanyń boıyndaǵy áleýetti oıatýǵa atsalysady.
Zań ókili retinde biz laıyqty urpaq qalyptastyrý – barshamyzdyń ortaq paryzymyz ekenin jaqsy túsinemiz. Sondyqtan osy jaýapkershiliktiń bir bóligin óz moınymyzǵa alýǵa daıynbyz. Sebebi jastardy qoldaý – tutas eldiń bolashaǵyna jasalǵan eń utymdy ınvestısıa.
Qazaqstan Prezıdenti Qasym-Jomart Toqaevtyń sózine súıensek: «Jastar – jarqyn bolashaqqa degen barlyq úmitimizdiń beınesi».
Mine, osyndaı jańasha bastamalar arta tússe eken deımiz. Óıtkeni qýatty memleket – eń aldymen senimge ıe, syıly jáne daýsy estilgen jas býynnan bastaý alady.