Dos tańdaı bilý de – ómirlik maqsattardyń biri. Naǵyz dos qıyn sátterde demeı biledi. Túnniń bir ýaǵy bolǵanyna qaramastan, ol tátti uıqysyn qıyp, dosyn tyńdaı alady. Al qýanyshynda rıasyz kóńilimen birge shattana ketedi. Onda dosyna degen kúnshildik, satqyndyq, ekijúzdilik bolmaıdy. Oǵan qaltqysyz senedi. Ol ony eshbir jaýǵa bermeıdi.
Seniń dál osyndaı sondaı dosyń bar ma? Bul suraqty biz jas oqyrmandarymyzǵa qoıǵan bolatynbyz.
Qanat TOQTASYN, 2-kýrs stýdenti: «Únemi saıaq júretinmin...»
Meniń dosym – Meıram. Kolejde birge oqımyz. Men ony naǵyz dosym dep aıta alamyn. Birinshi kýrsta júrgende eshkimmen aralasyp kete almadym. Aıaǵymdy syltyp basatynymnan uıalyp, kózge túse bermeýge tyrysyp, únemi saıaq júretinmin. Osylaı jalǵyzsyrap júrgen sátterimde janymnan Meıram tabyldy. Ol óte sezimtal jigit. Meniń eleýsiz, tuıyq júretinimdi ańǵarǵan bolýy kerek, birde dene shynyqtyrý sabaǵynda ózi kelip birinshi til qatty. Ras, onyń kolejde jaqyn aralasatyn jigitteri jeterlik. Kópshil. Biraq onyń ómirinde meniń ornymnyń bólek ekenin sezemin.
Ótken oqý jylynda Meıram bir jigitpen eregisip qaldy da, ekeýi bir-biriniń jaǵasynan aldy. Kabınettiń terezesi syndy. Dırektor Meıramdy oqýdan shyǵaramyn dedi. Kolejde «krysham» isteıtindikten, dosymdy aman alyp qalý úshin «terezeni syndyrǵan men» dep turyp aldym. Sóıtip, másele tez sheshildi. Osy jazda bir-birimizdiń aýylymyzǵa qydyryp barǵaly jatyrmyz. Dostyǵymyz nyǵaıyp keledi.
SÁBIT, bazarda satýshy: «Ótirigin keshire almadym»
Jasyratyny joq, bazarda aldap-arbaýsyz kún kórý múmkin emes. Iá, taýarymyz tez ótip ketsin dep keıde túrli qýlyqqa da basasyń. Biraq naǵyz dosym dep júrgen adamyńnyń ótirigin keshirý qıyn eken. Bir aýylda ósip, bir synypta oqyp, qalada júrgenimizge úsh jyl bolǵan dosymdy áli tanymaǵan ekenmin dep oıladym.
«Adamnyń kóńili bir atym nasybaıdan qalady» degen ras sóz eken. Ol meniń taýarlarymnan bildirtpeı urlap otyrypty. Bazardyń ekinshi basynda otyratyn jezdesine tası beripti aıaqkıimderimdi. Bul satqyndyǵyn kótere almadym. Biz bazarda qazir de birge turamyz. Sálemimiz túzý. Jigitpiz ǵoı, jaǵa jyrtysyp jatqanymyz uıat shyǵar dep, aryǵa barmadym. Biraq aramyz burynǵydaı emes. Ótkende anasy kezdesip qalyp: «Sábıt, nege joǵalyp kettiń? Apa, palaý jasańyzshy dep arsalańdap kirip keletiniń bar edi, keıingi kezde múldem kórinbeısiń», – dep báıek bolyp jatyr. Úlken kisiniń aldynda ne aıtaryńdy da bilmeı qalady ekensiń. Dostan qalǵan kóńildi qalaı jetkizersiń?!
AIMAN, stýdent: «Qurbymdy qyzǵanyp qalamyn»
Meniń dosym jaqsy adam. Sabyrly, oıly. Tipti, anam keıde «Raýshandaı salmaqty bolsań qaıtedi, sen kóp kúlesiń» dep úlgi etip otyrady. Meniń ańqyldaǵan ashyqtyǵym, onyń baısaldylyǵy qudaı bergen minez ǵoı endi. Meniń aıtaıyn degenim, Raýshannyń kishkentaıdan birge ósken, ınternatta jatyp oqyǵan Janat esimdi synyptas qurbysy bar. Keıde úsheýmiz birge qydyrýǵa shyǵamyz. Raýshan Janatty menen artyǵyraq kóretin sıaqty, qyzǵanyp qalatyn kezderim de joq emes.
Ondaı sátterde ózimdi «bala kezden ósken qurbysy ǵoı» dep jubatyp qoıatynym bar. Biraq Janat ondaı qurmetke turmaıtyn sıaqty. Olaı deıtinim, Janat ekeýmiz ońasha qalǵanda Raýshannyń ómiriniń kóleńkeli tustaryn jıi aıtyp otyrady. Jamandaıdy. Óter dúnıe ótip ketti emes pe. Jan qurbysynyń syrtynan túrli áńgimelerdi aıtyp alyp, erteńine eshteńe bolmaǵandaı onymen birge kúlip-oınap ketip bara jatatyny meni oılandyrady. Ondaı adamnyń kúnderdiń kúninde aıaǵyńnan shalyp, qulatyp ketýi ǵajap emes dep oılaımyn.
Raýshan eshkimge jamandyq oılamaıtyn aıaýly qyz. Sondyqtan Janat týraly aıtýǵa áli kúnge táýekel ete almaı júrmin.
P.S. «Jaqsy kıim boıǵa jarassa, jaqsy joldas oıǵa jarasar». Sizdiń dosyńyz kim, ol qandaı adam?