Buǵan qosa ár keshikken kúnge ósimpul jazylady.
Memlekettik kirister departamentiniń aqparatyna sáıkes, kólik salyǵyn tólemegenderdiń esepshoty 26 mamyrdan bastap buǵattalady, dep habarlaıdy Almaty-akshamy.kz
«Eskertýdi elemegen turǵyndardyń kóligi tárkilenip, esepshoty buǵattalady. Salyq ýaqytynda tólenbegen jaǵdaıda ár keshikken kúnge ósimpul jazylady. Boryshkerlerge bereshegi týraly habarlama joldanady. Habarlama otyz kúnde oryndalmasa, salyq buıryǵy joldanady. 26 mamyrdan bastap bereshekti májbúrli óndirip alý úshin jeke sot oryndaýshylarǵa beriledi. Salyq tólemeı júrgen 10 adamnyń kólik quraly tárkilendi. Olar dereý qaryzyn ótedi. Keıbir boryshker kóliginen aırylǵanda nemese esepshoty buǵattalǵan kezde ǵana salyq tóleýge júgire bastaıdy», - dedi Memlekettik kirister departamentiniń ókilderi.
Qaryzdy óndirý úshin sot oryndaýshylar boryshkerdi shetel asyrmaýǵa, kóligin aıyppul turaǵyna aparýǵa quqyly. Banktegi esepshottaryn buǵattap, basqa da múlkine tyıym salady.