Sena teatry alǵash ret qazaqsha qoıylym qoıdy
Almatydaǵy Sena teatrynyń repertýaryna taǵy bir qoıylym qosyldy. Bul poezıalyq týyndynyń jóni bólek. Teatr akterleri óz kórermenine alǵash ret qazaqsha spektákl usynyp, kópshilik qoshemetine bólendi. 
«Seni izdedim, mahabbat» atty jańa ádebı-sazdy qoıylymda aqynnyń qıyn taǵdyry, alǵashqy jaýapsyz mahabbaty men shym-shytyryq oqıǵasy baıandalady. Poezıa áleminiń tuńǵıyǵyna súńgip, ásem sezimge bólenip, ómirdi súıýdi, mahabbatty, shynaıy sezimdi qadirleýdi jyrlaıtyn M.Maqataev, F.Ońǵarsynova, O.Súleımenov, T. Moldaǵalıev syndy tanymal aqyndardyń shyǵarmalarynan quralǵan. Spektákldiń negizi – aqynnyń ómiri. Aqynnyń jan-dúnıesiniń arpalysqa túsken sátin kóre alasyzdar. Rejıseri – Natalá Lýkánova.
Sena teatrynda nebári 15-ke jýyq akter bar. Barlyǵy birdeı kásibı akter bolmasa da, qoıylymdy sátti alyp shyqty. Joǵary deńgeıde óner kórsetti.
«Bizdiń teatr 2020 jyly QR eńbek sińirgen ártisi, akter jáne rejıser Tahır Vosılovtyń bastamasymen quryldy. Ol Sena teatryn ashqanǵa deıin 20 jyl N.Sas atyndaǵy jasóspirimder teatrynda qyzmet etken. Rejıser retinde de tájirıbesi mol akter. Osydan 4 jyl buryn jańa teatrda jas akterlerdiń basyn qosyp, kórermenge alǵashqy qoıylymyn usyndy. Barlyq qoıylymǵa Tahır Vosılovtyń ózi rejıser boldy. Bas kezinde repertýarda 4-5 qoıylym ǵana bolatyn. Keıbiri kishkentaı kórermenderimizge arnaldy», – dedi Sena teatrynyń dırektory Merýert Elýbaeva.
Taqyrypqa oraı
Marıa QOISHYBAEVA, trýppa jetekshisi, teatr aktrısasy:
Teatr tarıhynda eki tilde birdeı qoıylǵan spektákl boldy. Biraq bul joly tek qazaqsha usynyp kórgimiz keldi. Qoıylymnyń senarıi boıynsha aqyn alǵashqy mahabbatyn izdeýmen bolady. Fransýzdarda adam árdaıym alǵashqy mahabbatyn izdeıdi degen túsinik bar. Meniń negizgi mamandyǵym – psıholog. Psıhologıada adamnyń alǵashqy mahabbaty – anasy bolyp sanalady. Bálkim, sol bir izdegen jannyń boıynda anasynyń beınesi bolýy múmkin. Qoıylym boıy keıipker alǵashqy mahabbatyn elestetýmen bolady. Birde-bir qoıylymdarymyzdy jibermeı kóretin turaqty kórermenderimiz kóp. Qazaq tilinde birinshi ret qoıyp otyrǵandyqtan, akterlerdiń bárinde qobaljý bar. Jalpy, kez kelgen akterge senarı boıynsha jumys istegen jeńilirek bolady. Biraq bul jolǵy spektáklde aqyn óleńderi oqylyp, ánderi shyrqalady. 