Ádiletti qoǵam qurý - búgingi qazaq qoǵamynyń basty qundylyǵy. Memleket basshysy Qasym-Jomart Toqaevtyń sońǵy úsh jyldaǵy Qazaqstan halqyna Joldaýlarynyń ıdeıalyq túpqazyǵy – Ádiletti Qazaqstan qurý strategıasyna baǵyshtaldy.
Bul saıası da tarıhı qujatta: «Azamattary, ásirese jastary mádenıetti, jańashyl ári jasampaz ulttyń upaıy túgel. Sondyqtan biz órkenıetti el bolýǵa kedergi jasaıtyn jaǵymsyz ádetterden arylýymyz kerek»-delingen.
Osy oraıda Narxoz ýnıversıteti Quqyq jáne memlekettik basqarý mektebi stýdentterine Qazaqstan Respýblıkasy Parlamenti Senaty Tóraǵasynyń orynbasary, 2-synypty memlekettik ádilet keńesshisi, zań ǵylymdarynyń kandıdaty Jaqyp Qajmanuly Asanovtyń oqyǵan qonaq dárisi ótti. Jastardyń saıası mádenıeti men quqyqtyq, fılosofıalyq kózqarastaryn qalyptastyrýǵa yqpal etken dáristiń berer bilimi, kóteter júgi salmaqty.
Senator J.Q. Asanov: «Álem qarqyndy ózgerýde, jáne memlekettik basqarý bul ózgeristerge sáıkes kelip qana qoımaı, olardan ozyq bolýy qajet», - deıdi. Spıker zań salasyndaǵy eń alǵash tájirıbesinen bastap, tolysqa, ornyqqan kemel jasqa deıingi kásibı portfolıosyn bilim, bilik jáne daǵdy atty ushtaǵanǵa toǵystyra kele, osy qasıetterdiń bári izgilik pen adamgershilik ádil tarazysynan elep, ekshep, paıymdap baryp sheshim shyǵarýda dep atady.
Dáriske tıek bolǵan tezıs - jas adamnyń ómirlik maqsaty men bolashaq qyzmet traektorıasyn sanaly túrde saralap, talǵap, óziniń múmkindikteri men qarym-qabiletin baǵyttaý.
Bul turǵyda, salıqaly da sarabdal zańger naǵyz kóshbasshy – tek prosesti jáne adamdardy basqaratyn adam ǵana emes, eń aldymen, ózin-ózi basqaryp, bolashaqty qura alatyn tulǵa dep tanıdy.
Dáristi tyńdaǵan bolashaq zańger, saıasatker, dıplomat mamandary rýhtanyp, dáriskerdiń suraqtaryna jarysa jaýap berip, ózderi qyzyǵy suraqtar qoıyp, ınteraktıvti qalypta órbidi.
Qazirgi memlekettik basqarý birqatar syn-tegeýrindermen betpe-bet kelýde dep atap ótken spıker birneshe tujyrymdar usyndy. Sonyń ishinde, memlekettik organdardyń jumys tıimdiligin arttyrý, sıfrlyq tehnologıalardy engizý, halyqpen ózara is-qımyldy jaqsartý jáne sheshim qabyldaý úderisiniń ashyqtyǵyn qamtamasyz etý máseleleri erekshe oryn alady. Búgingi tańda memlekettik menedjment mamandardan basqarýdyń zamanaýı quraldary, tabysty tájirıbeleri men turaqty memlekettik ınstıtýttardy damytýǵa yqpal etetin strategıalyq tásilder týraly tereń bilimdi talap etedi.
Dáristi tyńdaǵan stýdentterdiń biri Hasanova Indıra: Óte paıdaly, aqparatqa toly jáne qyzyqty dáris boldy. Spıkerdiń kúrdeli jaǵdaılardy qarapaıym túsindirip, ony kúndelikti ómirdiń bir bóligi retinde aıtýy unady. Bizge usynǵan úsh qaǵıda sonshalyqty qıyn emes, biraq oǵan tózim, bilim ján izdenis kerek. Máselen, jańa isti bastaǵanda tek qana bir ǵana eń mańyzdysyna fokýs qoıý. Óz ortańnan kásibin adal ıgergen mamandardy qoldap, komandalyq jumystarǵa jumyldyra bilý. Sondaı-aq ozat quraldar men tehnologıalardy úırený jáne tıimdi paıdalana alý.
Bul oılar meniń oqý men jumysqa degen kózqarasymdy ózgertti. Endi men basty nársege nazar aýdarý qaǵıdasyn kúndelikti ómirimde qoldanǵym keledi, sondaı-aq múmkindikter men adamdarǵa muqıat bolýdy úırenýim qajet, - deıdi.
Al stýdent Qurmanqulova Ásel dáristen alǵan áserin spıkerdiń boıynan tabandylyq pen úzdiksiz bilim alýdyń eń ozat úlgisi men myqty basshynyń bolmysyn tanydym deıdi. Ásirese, J. Asanovtyń sot júıesindegi tıimdi jurgizgen reformalary men úshin tereń zertteıtin keıs boldy. Sondaı-aq, qylmystyq jazalardy izgilendirý men túrme turǵyndarynyń sanyn azaıtýdaǵy tájirıbesin kóp jastar oqyp, bilse eken. Bul qoǵamdaǵy áleýmettik ádilettiliktiń kórinisi ári nátıjesi.
Jaqyp Asanovtyń dárisi stýdentterge, oqytýshy, profesorlarǵa quqyqtyq júıe, basqarý jáne reformalar týraly tereń túsinik berip, olardyń bolashaq kásibı damýyna qundy úles qosty.