14 qańtar kúni ótken QR Parlamenti Senat depýtattaryn saılaýda zań buzýshylyq oryn alǵan joq. Bul týraly QR Ortalyq saılaý komısıasynyń múshesi Asylbek Smaǵulov aıtty, dep habarlaıdy Almaty-akshamy.kz QazAqparatqa silteme jasap.
«Ótken saılaýǵa qatysty qosymsha málimet bergim kelip otyr. Iaǵnı, daýys berý kúni «Saılaý týraly» Konstıtýsıalyq zańdy buzý týraly aýmaqtyq saılaý komısıalarynan jáne tańdaýshylardan shaǵymdar men aryzdar kelip túsken joq», - dedi Asylbek Smaǵulov Ortalyq saılaý komısıasynyń otyrysynda.
Al OSK tóraǵasy Nurlan Ábdirov bul saılaýdyń ádil ótkendigin bildiretindigin basa aıtty.
«Demek, bul - daýys berýdiń, sondaı-aq basqa da saılaý rásimderiniń saılaý zańnamasynyń normalaryna saı ótkendigini kórinisi», - dep atap ótti OSK tóraǵasy.
Osydan keıin Ortalyq saılaý komısıasy 2023 jylǵy 14 qańtarda ótken QR Parlamenti Senatynyń depýtattaryn saılaýdyń qorytyndylaryn anyqtaý jáne jarıalaý týraly, sonymen qatar bıyl 14 qańtarda ótken Astana qalasynan QR Parlamenti Senatynyń shyǵyp qalǵan depýtatynyń saılaýynyń qorytyndylaryn anyqtaý jáne jarıalaý týraly qaýlylardy qabyldady.