Balalarǵa ózderi armandaǵan túrli jańa jyldyq syılyqtar tabystalady
Elordada kópten kútken «Saz sıqyry» qaıyrymdylyq festıvali ótti, dep habarlaıdy Almaty-akshamy.kz.
Joba aıasynda aýyldy eldimekenderde ornalasqan balalar úılerine kómek kórsetiledi. Sondaı-aq balalarǵa ózderi armandaǵan túrli jańa jyldyq syılyqtar tabystalady. Olardyń qatarynda velosıped, skeıt, samokat, telefondar men planshetter t.b. bar. Jyl saıyn jańa jyl meıramy qarsańynda ótkiziletin «Saz sıqyry» festıvali aıasynda búldirshinder meıirim men qamqorlyq sezimine bólenip, merekelik atmosferany sezinedi.
Bıyl «Saz sıqyry» jobasy aıasynda kelesi uıymdarǵa kómek kórsetiledi:
1.Otbasy úlgisindegi balalar aýyly (Kenjekól aýyly, Pavlodar obl.)
2. Qıyn jaǵdaıda qalǵan balalarǵa qoldaý kórsetý ortalyǵy (Taraz qalasy)
3.Otbasy úlgisindegi balalar aýyly men jasóspirimder úıi (Geolog aýyly, Atyraý obl.)
4. «Tańsholpan» balalar úıi (Prıshahtınsk aýyly, Qaraǵandy obl.).
Jınalǵan qarajatqa joǵaryda kórsetilgen balalar mekemelerindegi oıyn bólmeleri men oqý sheberhanalaryna arnalǵan zamanaýı qural-jabdyqtar, sondaı-aq ońaltý jabdyqtary satyp alynady.
Festıváldiń uıymdastyrýshysy – «Degdar» gýmanıtarlyq qory.
«Saz sıqyry» jobasy bıyl 4-ret ótýde. Joba aıasynda biz jyl saıyn 4 balalar úıine kómek kórsetemiz. Qazir joba tarıhy elimizdiń túkpir-túkpirinde ornalasqan 12 balalar úıin qamtıdy. Joba balalar úıine qajetti medısınalyq jáne oqytý jabdyqtaryn satyp alýdy, sondaı-aq ár balaǵa syılyq berýdi kózdeıdi. «Saz sıqyry» jobasy – bul balalarǵa umytylmas emosıa men merekelik kóńil-kúı syılaıtyn naǵyz sıqyrshylardyń jobasy. Elimizdiń árbir azamaty osy jobaǵa qatysý arqyly ata-anasynyń qamqorlyǵynsyz qalǵan búldirshinderge qoldaý kórsetetin sıqyrshy bola alady»,- deıdi «Degdar» qorynyń dırektory Laýra Ahmetova.
Balalar úıiniń ókilderi de uıymdastyrýshylarǵa óz alǵystaryn bildirdi.
«Bizdiń tárbıelenýshilerge osyndaı qamqorlyq kórsetip, qoldaý bildirgen «Degdar» qoryna zor alǵysymyzdy aıtamyz. Balalar ózderi kópten beri armandap júrgen syılyqtaryn alatyn kúndi asyǵa kútýde. Bul bizdiń balalar úshin úlken qýanysh, esten ketpes estelik. Sondaı-aq búgingi tamasha merekelik konsert úshin de alǵysymyz zor»,- dep jetkizdi Atyraý oblysynyń Geolog aýylynda ornalasqan «Otbasy úlgisindegi balalar aýyly men jasóspirimder úıiniń» dırektory Gúlsara Botataeva.
İzgilik pen meıirim shýaǵyna toly qaıyrymdylyq festıvaliniń sharapatyn balalar úıiniń tárbıelenýshilerimen birge elordalyq kórermender de sezine aldy. Bas qalanyń turǵyndary men qonaqtary tańǵajaıyp áýenderge toly mýzyka álemine saıahat jasady. Festıvál aıasynda «Qazaqstan» ortalyq konsert zalynda ótken «Rojdestvo áýenderi» qaıyrylymdylyq konserti kórermenniń zor yqylasyna bólendi. Konsertke otandyq klasıkalyq ónerdiń maıtalmandary Saltanat Ahmetova, Damır Sadýahasov, ASTANA OPERA halyqaralyq opera akademıasynyń bilim alýshylary qatysty. «Astana opera» teatrynyń sımfonıalyq orkestriniń súıemeldeýimen ótken konserttiń dırıjeri – Konstantın Hvatynes (Reseı). Sahnada belgili operalar men operettalardyń arıalary oryndaldy. Kórermender bul konsertti ádettegideı tegin tamashalaı aldy.
Buǵan qosa, konserttik zaldyń holynda balalar úıiniń tárbıelenýshilerine arnalǵan qaıyrymdylyq bokstary ornatyldy.
Uıymdastyrýshylar atap ótkendeı, 2017 jyldan bastaý alǵan «Saz sıqyry» festıvalin ótkizý ıgi dástúrge aınaldy. Festıvál aıasynda 2017- 2020 jyldar aralyǵynda 121 854 812 tg. jınaldy. Bul qarajatqa áleýmettik qoldaýǵa muqtaj balalar úıleri úshin oıyn bólmeleri men oqý sheberhanalaryna arnalǵan qural-jabdyqtar, sondaı-aq ońaltý jabdyqtary satyp alyndy. «Saz sıqyry» festıvaliniń negizin qalaýshy jáne ıdeıalyq bastaýshysy – Darıǵa Nazarbaeva. Ol «Degdar» qorynyń Qamqorlyq keńesin basqarady.