Mundaı pikirdi sáýletshi, Almaty máslıhatynyń depýtaty Nazerke Mýndahanova dóńgelek ústel barysynda bildirdi, dep habarlaıdy aqshamnews.kz.
Onda Raıymbek dańǵyly boıynsha Pýshkın kóshesinen Seıfýllın dańǵylyna deıingi BRT dáliziniń birinshi ýchaskesiniń jobasy usynyldy.
Sarapshylar jobanyń negizgi aspektilerin oń atap ótip, onyń kólik ınfraqurylymyn jaqsartýǵa jáne qala turǵyndarynyń ómir súrý sapasyn arttyrýǵa tıimdi áserin atap ótti.
Nazerke Mýndahanovanyń pikirinshe, Raıymbek dańǵylyndaǵy BRT jobasy avtomobıl joldarynyń júktemesin azaıtýǵa, irgeles aýdandar arasyndaǵy kólik qatynasyn jaqsartýǵa jáne qoǵamdyq kólikke jyldam ári yńǵaıly qol jetkizýdi qamtamasyz etýge yqpal etedi.
Qalalyq kólik ınfraqurylymyn jańǵyrtýdyń mańyzdylyǵyn eskere otyryp, sarapshy qurylys jumystaryn kelesi jyldyń sáýir aıynda bastaýdy usyndy. Onyń pikirinshe, bul qalanyń kólik máselelerin sheshýge keshendi kózqarasty qamtamasyz etýge múmkindik beredi.
«BRT-bul búkil qalamen baılanysty bolatyn sapaly jaıaý júrginshiler men qoǵamdyq kólikterdegi eń jaqsy tájirıbelerdiń biri. Raıymbek batyr dańǵyly boıyndaǵy joba - jaqsy joba. Bul dańǵyl – qaladaǵy eń uzyn dańǵyldardyń biri, ol 70 myńǵa jýyq avtokólik júrgizýshisi ótetin úlken kólik toraby. Júıeni neǵurlym tegis engizý jáne qurylys prosesinde múmkin bolatyn ózgeristerge beıimdelý úshin maksımaldy tıimdilik úshin kelesi jyldyń sáýir aıynda qurylys-montaj jumystaryn bastaýdy usynamyz. Bul tásil resýrstardy tıimdirek paıdalanýdy jáne ártúrli qyzmetterdiń jumysyn úılestirýdi qamtamasyz etedi», - dedi Nazerke Mýndahanova.
Sarapshylar qaýymdastyǵynyń pikirin eskere otyryp, jobany birneshe kezeńde júzege asyrý týraly sheshim qabyldandy. Qalalyq mobıldilik basqarmasynyń basshysy Saǵyndyq Telibaev atap ótkendeı, osy jyldyń kúzinde merdigerlik uıymdy anyqtaý boıynsha eki ýchaskege konkýrs jarıalanady: Pýshkın kóshesinen Seıfýllın dańǵylyna deıin jáne Seıfýllın dańǵylynan Ahrımenko kóshesine deıin.
«Bıyl ınjenerlik jelilerdi qaıta qurý, osti bólý sıaqty daıyndyq jumystaryn bastaımyz jáne «Saıahat» aýdanynda iri aıaldama keshenderiniń qurylysyn aıaqtaımyz. Al negizgi qurylys-montaj jumystaryn kelesi maýsymnan bastaımyz», - dedi Saǵyndyq Telibaev.