Ulttyq ekonomıka vıse-mınıstri Azamat Ámrın salyq reformasyna qatysty mańyzdy máselelerge toqtaldy.
Onyń aıtýynsha, qosylǵan qun salyǵy (QQS) boıynsha tirkeý sheginiń joǵary bolýyna baılanysty kásipkerler bıznesin bólshektep, salyq tóleýden jaltarady. Sonyń saldarynan memleket jyl saıyn shamamen 800 mlrd teńge kóleminde tabystan aıyrylady, dep habarlaıdy aqshamnews.kz.
- Orta bıznes de-fakto bar, biraq de-úre joq. Iaǵnı keı kásipkerler qosylǵan qun salyǵynan (QQS) jaltarý úshin bıznesti birneshe usaq qurylymǵa bóledi. Mysaly, iri kásiporyn ıesi ony birneshe JSHS retinde bólip tastaıdy.
- Búdjetke túsetin qarajat azaıady. Mundaı sqemalar el ekonomıkasyna úlken shyǵyn keltiredi.
- Ádil básekelestik zańdylyǵy buzylady. Salyq tóleıtin adal kásipkerler kóleńkeli ekonomıkada júrgendermen teń dárejede básekelese almaıdy.
- Máseleni sheshý joldary. QQS boıynsha tirkeý shegin tómendetý jáne jeńildetilgen arnaıy rejımdi tek B2C bızneske qoldaný usynylyp otyr.
- Memleket pen kásipkerlerdiń birlesken áreketi mańyzdy. Eger bıznes salyq ádilettiligin qoldamasa, memlekettik organdar kóleńkeli ekonomıkany joıýda tolyq nátıjege jete almaıdy.
Qarjy jáne ekonomıka salasynyń basshylary 11 aqpannan bastap óńirlerde bıznes ókilderimen kezdesip, Úkimettiń salyq reformasyn talqylap jatyr.
Biz mynadaı tetikti qarastyrýdy usynamyz: jalpy belgilengen QQS mólsherlemesi 16%, azyq-túlik jáne dári-dármek óndirýshilerdi QQS-tan tolyq bosatý, al birqatar salalar úshin – 10% aralyq mólsherleme bolady. Osylaısha, Úkimet usynyp otyrǵan mólsherlemelerdi saralaý: 16%, 10%, 0% jáne bosatý, - deıdi Azamat Ámrın.
QQS – búdjetti tolyqtyrýdyń negizgi kózderiniń biri. QQS mólsherlemesin arttyrý jáne saralaý búdjettiń munaıdan túsetin ózgermeli kiristerine táýeldiligin azaıtýǵa jáne áleýmettik jobalardy qarjylandyrýǵa múmkindik beredi.
Salyq reformasyn iske asyrý kezinde el búdjetine túsetin salyq túsimderi jyl saıyn 4-5 trln teńgege artady dep boljanyp otyr. Bul qarajat Ulttyq qorǵa táýeldilikti azaıtýǵa, memlekettik qaryz deńgeıin tómendetýge, ınvestısıalyq jobalardy qoldaýǵa, damý ınstıtýttaryn nyǵaıtýǵa, turǵyn úı-kommýnaldyq sharýashylyǵyn jáne jylý-energetıka júıesin jańǵyrtýǵa qosymsha resýrstar bólýge múmkindik beredi