Saýd Arabıasynyń soltústigindegi Al-Djaýf aımaǵynyń bir bóligine kenetten qar jaýdy dep habarlaıdy jergilikti Khaleej Times basylymy.
Osydan birneshe kún buryn aımaqtyń keıbir bólikterine burshaq aralas nóser jaýǵan bolatyn. Al 2 qarasha kúni kúzgi qar jaýyp, taýly aımaqtardy aq jamylǵyǵa orady.
Qalyń jaýyn-shashyn taý basynan aqqan sarqyramalarǵa sebep boldy. Jergilikti basylymnyń aıtýynsha, mundaı qubylys shóldi dalaǵa paıdaly áserin tıgizip, kóktemde kózdiń jaýyn alatyn dala gúlderiniń, atap aıtqanda lavanda, hrızantema jáne basqa da hosh ıisti ósimdikterdiń gúldenýine yqpal etýi múmkin.
Bul aımaqtyń temperatýrasy ádette munshalyqty tómendemeıtindikten, qarly kórinis jergilikti turǵyndar úshin úlken tańdanys boldy.