Qazaqstandyq qajylarǵa barynsha qoldaý kórsetiledi.
Bıyl Qazaqstannan qajylyq paryzdy óteýge 3 myń adamǵa ruqsat berildi. Osyndaı kelisim Saýd Arabıasy Koróldiginde (SAK) Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanulynyń Qajylyq jáne umra mınıstri Taýfık ıbn Faýzan ar-Rabıamen kezdesýinde jasaldy, dep habarlaıdy Almaty-akshamy.kz QazAqparatqa silteme jasap.
Kezdesýde bıylǵy qajylyqty uıymdastyrý máseleleri sóz boldy.
Naýryzbaı qajy qazaqstandyq qajylarǵa barynsha qolaıly jaǵdaı jasaý boıynsha óz usynysyn jetkizdi. Onyń ishinde eń mańyzdysy qajylardy jetkizetin áýe tasymalynyń tıimdi baǵada bolýy týrasynda kelissózder júrgizildi. Óıtkeni charterlik áýe reısteriniń baǵasy qazaqstandyqtar úshin qymbatqa soǵýda.
Óz kezeginde Taýfık ıbn Faýzan ar-Rabıa qazaqstandyq qajylarǵa barynsha qoldaý kórsetetinin aıtty.
Ekijaqty kezdesý barysynda bıyl Qazaqstannan 3 myń adam qajylyq paryzyn óteıtini týraly kelisildi.
Saýd Arabıasy tarapy Qazaqstanǵa berilgen resmı 3 myń orynnan tys, qajylyq maýsymda elge kirýge eshkimge jol berilmeıtinin ashyp aıtty.
Budan bólek, Qazaqstannyń bas múftıi Dúnıejúzilik ıslam lıgasynyń bas hatshysy sheıh, doktor Muhammed ıbn Abdýlkarım ál-Issamen kezdesken.
N.Taǵanuly Dúnıejúzilik ıslam lıgasynyń bas hatshysyn Qazaqstanǵa saparmen shaqyrdy.
«Dúnıejúzilik ıslam lıgasy Qazaqstanda ótetin Álemdik jáne dástúrli dinder lıderleriniń sezin, bizdiń ortaq bastamalarymyzdy qoldap keledi. Ózińizdi qyrkúıek aıynda Qazaqstan astanasynda ótetin Álemdik jáne dástúrli dinder lıderleriniń VII sezine qatysý úshin arnaıy shaqyramyz. Bizdiń maqsatymyz táýelsizdik alǵan tustan beri beıbitshilikti ustaný, álemde bolyp jatqan janjal, dinaralyq qaqtyǵystardyń aldyn alý. Osy rette lıganyń atqaryp otyrǵan jumysy orasan zor», - dedi bas múftı.
QMDB baspasóz qyzmetiniń málimetinshe, kezdesý sońynda bas hatshy Qazaqstanǵa shaqyrýdy qabyl alǵanyn jáne bul shara josparynda bar ekenin jetkizdi.