Sátbaev ýnıversıtetinde ýnıversıtettiń ustazy, Bilim berý salasynyń úzdigi tós belgisiniń ıegeri, Qazaqstan ınjenerlik mektebiniń kórnekti ókili Jámıǵa Ormanovanyń qurmetine arnalǵan aýdıtorıa ashyldy, - dep habarlaıdy Aqshamnews.kz tilshisi.
Saltanatty sharaǵa onyń týǵan-týystary, áriptesteri men shákirtteri qatysty. Aýdıtorıanyń ashylý saltanatynda ýnıversıtet rektory Meıram Begentaev sóz sóılep, osy isti júzege asyrýǵa atsalysqan barlyq jandarǵa alǵys bildirdi:
"Jámıǵa Ormanova atyndaǵy aýdıtorıany asha otyryp, biz urpaqtar sabaqtastyǵyn jalǵastyramyz, ári óziniń mamandyǵyna degen adaldyǵymen erekshelengen uly tulǵany qazirgi stýdentterge úlgi etip kórsetemiz. Osy aýdıtorıada bilim alatyn árbir stýdent Jámıǵa Ormanovadan ónege alyp, adamgershilik pen adal eńbekke talpynady dep senemin", – dedi rektor.
Jámıǵa Ǵalıqyzy Ormanova – taý-ken ınjeneri, marksheıder, belgili jazýshy, jýrnalıs ári aýdarmashy Ǵalı Ormanovtyń qyzy. Ol ómiriniń qyryq jyldan astam ýaqytyn Sátbaev ýnıversıtetine arnady.
1954 jyly Qazaq taý-ken metalýrgıa ınstıtýtyn aıaqtap, osy jerde aspırantýrany da támamdady, sóıtip ózi oqyǵan oqý ornynda ustazdyq etýdi, shákirt tárbıeleýdi jáne ǵylymı zertteýmen shuǵyldanýdy ómirlik joly retinde tańdady. Ol «Geodezıa», «Marksheıderlik isi», «Taý-ken jumystarynyń áserinen jer qyrtysynyń jáne jer betiniń yǵysýy», «Topografıalyq jáne marksheıderlik syzý» pánderiniń bilikti oqytýshysy retinde stýdentterdiń esinde saqtalyp qaldy.
Sonymen qatar Jámıǵa Ormanova kafedranyń ǵylymı-zertteý jumystaryna da belsene aralasyp, Qaraǵandy kómir baseıni men Tekeli qorǵasyn-myrysh kombınatyndaǵy jer qyrtysynyń yǵysý úderisterin zerttedi. Onyń kópjyldyq jumysynyń nátıjesi retinde 30-dan astam ǵylymı eńbegi jaryq kórdi.
Alaıda onyń eń basty qasıeti – stýdentterdiń boıynda ǵylym men mamandyqqa degen qyzyǵýshylyqty oıata bilýi edi. Onyń shákirtteri súıikti ustazdaryn eshqashan umytqan emes, únemi hal-jaǵdaıyn bilip, qonaqqa kelip, túlekter kezdesýlerine shaqyryp júrdi.
Sharaǵa Qazaqstannyń eńbek sińirgen qaıratkeri, QR Ulttyq jaratylystaný ǵylymdary akademıasynyń akademıgi Ulyqpan Sydyqov, tehnıkalyq ǵylymdar doktory, profesor Nurpeıisova Marjan, jazýshy, halyqaralyq alash syılyǵynyń ıegeri Maǵıra Qojahmetova, jıen nemeresi Aıdar Qyryqbaıuly jáne profesor, shákirtteri qatysty.
Sondyqtan da Jámıǵa Ǵalıqyzy atyndaǵy aýdıtorıanyń ashylýy búkil ýnıversıtet úshin mańyzdy oqıǵa bolmaq