Áleýmettik jelide Almatyda birneshe adamnyń 18 jastaǵy jigitti uryp-soqqany túsirilgen vıdeo tarady, - dep habarlaıdy Aqshamnews.kz tilshisi.
Ne boldy?
Anasynyń jazýynsha, 18 jastaǵy ulyn 11-inen 12 qazanǵa qaraǵan túni Tóle bı kóshesindegi kafe janynda mas er adamdar top bolyp uryp-soqqan.
"Olardyń biri es-tússiz jatqan balamdy basynan tepken. 15–20 kúdiktiniń ishinen tek úsheýi ǵana ustaldy degen aqparat bar. Barlyǵy ustalyp, zańǵa sáıkes jaýapqa tartylsyn", - dep jazdy ol.
Polısıanyń resmı túsindirmesi
Almaty qalalyq Polısıa departamentiniń baspasóz qyzmeti qasaqana densaýlyqqa zıan keltirý faktisi boıynsha qylmystyq is qozǵalǵanyn habarlady.
"Jedel is-sharalardyń nátıjesinde oqıǵaǵa qatysqandardyń barlyǵy anyqtalyp, ustaldy. Árqaısysynyń kinásiniń dárejesin jáne oqıǵanyń obektıvti mán-jaıyn anyqtaýǵa baǵyttalǵan tergeý amaldary júrgizilýde", - dep málimdedi polısıa.
Vedomstvo barlyq kináliler zańǵa sáıkes jaýapqa tartylatynyn, ár qatysýshynyń áreketine qaǵıdatty quqyqtyq baǵa beriletinin atap ótti. Tergeý barysy Almaty qalalyq PD basshylyǵynyń erekshe baqylaýynda.