Almatyda Keńes Odaǵynyń batyry, gvardıa polkovnıgi Baýyrjan Momyshuly atyndaǵy 5571 áskerı bóliminde 600-den asa jas sarbaz saltanatty túrde ant berdi.
Bul rásim Otan aldyndaǵy boryshyn óteýge bel býǵan ár azamattyń ómirinde mańyzdy oryn alady.
Alyp megapolıs — Almaty qalasynyń tynyshtyǵyn qamtamasyz etetin jedel brıgadaǵa ár óńirden jylyna eki ret jas tolyqtyrylym keledi.
İs-sharaǵa jaýyngerlerdi qoldaýǵa olardyń ata-ana, baýyrlary, dostary, bólimniń ardagerleri jáne «Ońtústik» óńirlik qolbasshylyǵy men quramanyń áskerı qyzmetshileri qatysty.
Almaty oblysynan shaqyrylǵan qatardaǵy Ravıl Magamed áskerge deıin Chaıkovskıı atyndaǵy mýzykalyq kolejde bilim alyp, úrmeli aspaptarda oınaıtyn mýzyka mamany bolǵan. Ulttyq ulanǵa kelip áskerı orkestrdi kórgen ol birden óziniń bolashaqta kim bolatynyn naqty sheshti. Merzimdik qyzmetti aıaqtaǵan soń, áskerı orkestrde qyzmet etemin deıdi jas jaýynger. Saltanatty sharaǵa Ravıldiń qos ájesi — Aısha apa jáne Sholpan apa, naǵashy atasy Málik aqsaqal jáne ata-anasy Renat Magameduly men Qanash Málikqyzy kelipti.
— Otan aldyndaǵy boryshtaryńdy abyroımen óteńder. Er-azamat degen atqa laıyq bolyńdar. Qyzmetterińe adal bolyńdar. Joldaryń ashyq bolsyn. Árqashan jaqsy sózge laıyq bolyńdar, eldiń rızashylyǵyna bólenińder. Komandırlerińdi tyńdańdar, tártipke baǵynyńdar! - dep Málik ata nemeresi men onyń qarýlastaryna batasyn berdi.
Saltanatty sharada erekshe oqıǵa boldy. 1 oqý rotasynyń sarbazy, Pavlodar qalasynan shaqyrylǵan qatardaǵy Jantóre Erzal eki myńǵa jýyq dúıim jurttyń aldynda súıgen qyzyna sóz saldy. Joldastarymen aldyn ala josparlap, komandırlerinen ruqsat alǵan Jantóre kópshilik ishinen Dana esimdi arýdy daýystap izdedi. Mundaıdy kútpegen boıjetken basynda ańtarylyp qaldy. Alańǵa aıaǵyn ımene basyp shyqqan Danaǵa jınalǵan jurt qol soǵyp, qoldaý bildirdi. Jas sarbazdyń usynysyna boıjetken qyz “Iá!” dep jaýap berdi.
Jantóre men Dana bir mektepte oqyǵan synyptastar eken. Dana búginde — mektep muǵalimi. Jantóre oǵan úılenýge usynys bildirýdi áskerge deıin sheshken eken. Biraq sóz salyp úlgermegendikten, osyndaı aıtýly kúnge nıettengen eken. Eki jastyń súıispenshiligi máńgilik bolǵaı!