Sara Nazarbaeva 85 jasyna qaraǵan shaǵynda qaıtys boldy, dep habarlaıdy aqshamnews.kz
Qazaqstannyń Tuńǵysh Prezıdentiniń birinshi jary Sara Alpysqyzy Qonaqaeva (burynǵy Nazarbaeva) ómiriniń sońǵy kezeńinde aýyr dertke shaldyqty. Jaqyndarynyń aıtýynsha, qazirgi tańda dárigerler onyń jaǵdaıyna qoldan kelgen em-dom jasap jatyr, alaıda densaýlyǵy nasharlaǵan kúıde qalyp otyr.
Tekti urpaqtan taraǵan
Sara Qonaqaeva 1941 jyly aqpan aıynda Qaraǵandy oblysynyń Buqar jyraý aýdanynda dúnıege kelgen. Ákesi Alpys Qonaqaev — sol kezeńdegi óńirdegi abyroıly, aýqatty azamattardyń biri. Jergilikti sharýashylyqty basqarǵan, el ishinde bedeldi bolǵan. Keıbir derekterde, jas Nursultan Nazarbaevtyń Qaraǵandyda bilim alyp, jumys tabýyna osy ákeniń yqpaly bolǵany aıtylady. Bul qoldaý eki jas arasyndaǵy qarym-qatynasqa da áser etkeni anyq.
Tasada qalǵan "tuńǵysh hanym"
Sara Alpysqyzy eldiń resmı tuńǵysh hanymy bolǵanymen, ol bul mártebeni keńinen paıdalanyp, el aldyna jıi shyqqan joq. Nursultan Nazarbaev jubaıyn memlekettik saparlarǵa nemese saltanatty rásimderge erte bermegen. Kóbine kópshilik aldynda qyzdarymen birge kórindi. Mysaly, 2015 jyly shetelge jasaǵan resmı saparynda jubaıynyń ornyna úlken qyzy Darıǵany ertip bardy.
Keıinirek Nursultan Nazarbaev óziniń estelikterinde olardyń otbasylyq qatynastaryna qatysty bylaı degen:
«Júrekke ámir júrmeıdi. Júrek basqa adamdy tańdady».
Bul málimdeme olardyń araqatynasyndaǵy alshaqtyqtyń ashyq jarıalanýy retinde qabyldandy.
Balalar taǵdyryna arnalǵan ómir
Saıasattan tys júrip-aq, Sara Alpysqyzy qoǵamdyq salada úlken eńbek sińirdi. 1990-jyldary ol «Bóbek» qaıyrymdylyq qoryn quryp, jetim jáne ata-anasynyń qamqorlyǵynsyz qalǵan balalarǵa arnalǵan jobalardy iske asyrdy. Onyń bastamasymen elimizde «SOS balalar aýyldary» ashyldy.
Ol sondaı-aq rýhanı-adamgershilik bilim berý ıdeıasyn alǵash ret mektep baǵdarlamasyna engizgen tulǵa boldy. Onyń bastamasymen elimizdiń mektepterinde «Ózin-ózi taný» páni engizildi. Bul pán oqýshylardyń rýhanı tereńdigi men adamgershilik qasıetterin damytýǵa baǵyttaldy. Keıin bul pán oqý baǵdarlamasynan alynyp tastaldy.
«Biz ony anamyz dep ataıtynbyz»
Balalar úıleriniń túlekteri qaýymdastyǵynyń basshysy Rafael Gasanov, kezinde SOS balalar aýylynyń tárbıelenýshisi bolǵan. Onyń aıtýynsha, Sara Alpysqyzy olarmen únemi baılanysta bolǵan.
– Ol bizge jıi keletin, syılyqtar ákelip, ómirdiń máni týraly áńgimeleıtin. Rýhanı qundylyqtardy baǵalaýǵa úıretti. Biz ony anamyz dep ataıtynbyz. Óz mysalymen adamnyń qandaı bolýy kerektigin kórsetti, – deıdi ol.
Gasanov jýyrda Sara Alpysqyzynan kitaptar men aqjarma tilekter alǵanyn, onyń áli de tárbıelenýshilerin umytpaıtynyn aıtty.
Sara Alpysqyzy – el táýelsizdiginiń alǵashqy kezeńindegi erekshe tulǵalardyń biri. Ol saıası sahnada emes, adamgershilik, qaıyrymdylyq, rýhanı salada eleýli eńbek qaldyrdy.
Qazirgi ýaqytta Almatydaǵy memlekettik mańyzdy emdeý mekemesinde Sara Alpysqyzy dárigerlerdiń baqylaýynda. Ǵımarat ishinde de, syrtynda da qosymsha kúzet qoıylǵan, naýqasqa syrt kózden tynyshtyq qamtamasyz etilýde. Túsirilim jasaýǵa jáne bógde adamdardyń kirip shyǵýyna shekteý qoıylǵan. Onyń janynda qyzdary – Darıǵa, Dınara jáne Álıa jáne eń jaqyn týystary bar.
Keı naýqastar Sara Alpysqyzyn emdeý mekemesiniń ishinde kózbe-kóz kórgenderin aıtyp otyr. Degenmen, onyń naqty jaǵdaıyna baılanysty resmı málimdeme jasalǵan joq.