Almatylyqtar tarıhı jádigerlerdi tegin tamashalaýǵa múmkindik aldy: Almatyda «Mýzeı túni» ótpek
Halyqaralyq mýzeı kúniniń qarsańynda Almaty «Mýzeı túni» degen keń kólemdi aksıaǵa daıarlyq jasap jatyr. Onda kelgen qonaqtar erekshe ekspozısıaǵa, teatrlandyrylǵan ekskýrsıaǵa, «Juldyzdy mýzeıdi», kvestter men spektákldardy tamashalap, alashtanýshylarmen, oqymysty-ǵalymdarmen júzdesip, pikir almaspaq. Óńirlik komýnıkasıalar ortalyǵynda ótken pres-konferensıada osy mádenı jańalyqtyń jaı-japsary aıtyldy, dep habarlaıdy aqshamnews.kz
1978 jyldyń 18 mamyrynan beri búkil álem mýzeı qyzmetkerleriniń kásibı merekesin atap ótip keledi. «Mýzeı túni» aksıasy alǵash ret 1997 jyly Berlınde ótken. Bul dástúrdi Qazaqstan da 2005 jyldan bastap atap óte bastap, qazir aksıany qyzyqtaýǵa qonaq kóp keletin boldy.
«Almaty – ótken tarıh pen qazirgi shaq astasyp jatqan erekshe qala. «Mýzeı túni» - bul naǵyz mádenı saıahat desek bolady. Onda ótken tarıhqa kóz júgirtip, óner álemimen tanysyp, oıyndarǵa qatysyp qaıta alasyz», - deıdi Almatydaǵy mýzeıler birlestiginiń dırektory Lázzat Saǵyndyqova.
18 mamyr kúni tańǵy saǵat 10:00-den bastap túnniń bir ýaǵyna deıin jeti birdeı mýzeı kelgen qonaqtardy tegin qabyldamaq:
- Almaty mýzeıi,
- Yqylas atyndaǵy Halyq aspaptary mýzeıi
- D.A. Qonaev mýzeıi,
- S. Muqanovtyń mýzeı-úıi
- Ǵ. Músirepovtyń múzeı-úıi,
- Ahmet Baıtursynulynyń mýzeı-úıi,
- Mýltımedıalyq dástúrli mýzyka ortalyǵy.
Halyqaralyq aksıanyń aıasynda almatylyqtar men qala qonaqtary óte qyzyqty baǵdarlamamen tanyspaq. Birlestiktiń quramyna kiretin mýzeılerde osyǵan oraı birneshe is-shara ótedi.
- Tanymdyq ınteraktıvti kvestter men vıktorınalar;
- Mýzeı eksponattaryna teatrlandyrylǵan ekskýrsıa;
- Almaty mýzeıinde – «Jańa ǵasyr» teatrynyń qoıylymy, «Almaty –mahabbatym meniń», S. Muqanovtyń mýzeıinde «Móldir mahabbat» spektákli, Ǵ. Músirepovtyń mýzeıinde «Qyz Jibek arıasy», D. A. Qonaev mýzeıinde «Adaldyq –asyl qasıet» qoıylymy ótedi;
- Almaty qalasynyń mýzeıinde (Elına Altynbekovanyń «Áıel beınesi jáne Qarǵaly dıademasy» men arheolog Marat Nýrpeısovtiń «Ejelgi Almaty: myńjyldyq qalasy») belgili qazaqstandyq restavratorlar men arheologtar leksıasy oqymaq.
- Mýzeı birlestigindegi «Mýzeıge tartý» aksıasynda qalanyń ár turǵyny úıdegi baǵaly buıymdy ákep tartý etedi.
- «Juldyzdy mýzeı»;
- Ashyq aspan astyndaǵy fotokórme men kıno kórsetilim;
- Belgili óner juldyzdary qatysatyn konsert (Erkesh Hasen, Ernar Amandyq, «Alataý serileri» toby men t.b.);
- Kezdesýler (jazýshylarmen, oqymysty-ǵalymdarmen, alashtanýshylarmen, D. Qonaevtyń qyzmettesteri, týǵan-týystarymen);
- Jasandy jadty qoldanǵan fotozona;
- Saz aspaptaryn jasaıtyn qolónershilerdiń sheberlik sabaǵy men t.b..
Merekelik baǵdarlama 16 mamyr kúni Almaty mýzeıinde Vengrıanyń Bas konsýldyǵymen birlesip qolǵa alǵan «Mato halyq óneri – vengr mádenıetiniń murasy» atty halyqaralyq kórmeniń ashylý saltanatymen bastalady. Bul kórme Qazaqstanda alǵash ret ótkeli otyr.
«Biz kelgen qonaqtarǵa «Mato halyq óneri – vengr mádenıetiniń murasy» atty úlken kórme usynbaqpyz. Bul kórme bizde alǵash ret ótip otyr. Mato kesteleý óneri IýNESKO-nyń materıaldyq emes mádenı murasynyń tizimine engen. Almaty mýzeıi sony alǵash ret halyqtyń nazaryna usynady», - dedi, Lázzat Saǵyndyqova.
Aksıanyń erekshi jobalarynyń biri – alty birdeı mýzeıdi qamtyǵan kvest-oıyn bolyp otyr. Oǵan belgili blogerler Ańsaǵan Sadyrhanov (ansagaan) pen Ǵalymjan Janqulov (galaland_) kelip qatysyp, olar onda arnaıy tapsyrmany oryndaıdy.
Kvestter, mýzeılik pazldar, akvagrım sekildi kishkentaı qonaqtarǵa arnalǵan aýmaqtar da jumys isteıdi osy kúni.
İs-sharanyń sońyna qaraı aksıaǵa qatysqandarǵa brend syılyqtar men sertıfıkattar tabys etiledi. Odan keıin erekshe kózge túsken mýzeı qyzmetkerlerin marapattaý rásimi bolyp ótedi.
Almaty qalasyndaǵy mýzeılerdiń birlestigi barsha jurtty óner, tarıh pen jańa áserge toly osy kúndi birge ótkizýge shaqyryp otyr. «Mýzeı túni – 2025» kimniń bolsyn esinde qalatyn erekshe oqıǵa bolmaq.