Sanaq saýaldaryna arnaıy sanaq.gov.kz saıty, E-Gov portaly arqyly tirkelip nemese Aitu mobıldi qosymshasy arqyly jaýap berýge bolady.
Sanaqtan onlaın ótý merzimi uzartyldy, dep habarlaıdy Almaty-akshamy.kz
Bul týraly málimdegen Ulttyq statısıka búrosy baspasóz qyzmetiniń aqparatyna saı, onlaın ótý múmkindigi halyq sanaǵy aıaqtalǵanǵa deıin qoljetimdi bolmaq.
«Sanaqtan onlaın ótý múmkindigi toqtatylǵan soń, elimizdiń barlyq óńirlerinen, ásirese, qalalardan onlaın sanaq fýnksıasy merzimin uzartý týraly kóptegen ótinishter túse bastady. Osyǵan baılanysty sanaq.gov.kz saıtynda onlaın saýalnama fýnksıasyn qaıta qosý týraly sheshim qabyldandy»,– delingen habarlamada.
Aıta keteıik, 1 qyrkúıek pen 15 qazan aralyǵynda onlaın-sanaq fýnksıasyn azamattardyń 40 paıyzǵa jýyǵy paıdalanǵan. 1 qazannan bastap ıntervúerler úı-úıdi aralaýdy bastady. Olar qazirdiń ózinde 5938259 adamǵa saýal salý júrgizdi. Onlaın ótken respondentter kelgen habarlamany ıntervúerlerge kórsetýi tıis. Olarǵa saýalnama qaıta júrgizilmeıdi.